• Yaratildi: 07.03.2022
• Yangilandi: 06.09.2022
• O'qildi: 2478

8-mart – Xalqaro xotin-qizlar kuni

Bahor va go‘zallik ayyomi bo‘lgan 8-mart – Xalqaro xotin-qizlar kuni bayrami “Navoiy kon-metallurgiya kombinati” aksiyadorlik jamiyati bo‘linmalarida keng nishonlanmoqda. Tantanali tadbirlarda kombinat xotin-qizlarining mehnati, korxona rivojiga qo‘shayotgan hissasi eʼtirof etilib, soha ilg‘orlari munosib rag‘batlantirilmoqda.

7-mart kuni Navoiy shahridagi “Farhod” madaniyat saroyida “Navoiy kon-metallurgiya kombinati” aksiyadorlik jamiyati, “Navoiyuran” davlat korxonasi, “NKMK jamg‘armasi” davlat muassasasida faoliyat olib borayotgan xotin-qizlar uchun qutlug‘ ayyomga bag‘ishlangan bayram tadbiri bo‘lib o‘tdi. Tantanada “NKMK” AJ Boshqaruv raisi – Bosh direktori Q.Sanaqulov korxona xotin-qizlarini bayram munosabati bilan samimiy tabrikladi.

Tabrikda “NKMK” Ajda bugungi kunda 6 ming nafardan ortiq xotin-qizlar, ular orasida 33 nafar davlatimizning yuksak mukofotlari sovrindorlari ulkan korxona ravnaqi yo‘lida astoydil xizmat qilib kelayotgani mamnuniyat bilan taʼkidlandi. O‘zbekiston Respublikasi Prezidentining 2022-yil 5-martda qabul qilingan “8-mart – Xalqaro xotin-qizlar kuni munosabati bilan mukofotlash to‘g‘risida”gi Farmoniga muvofiq, Shimoliy kon boshqarmasi kran mashinisti Bashorat Tursunova “Mehnat shuhrati” ordeni bilan mukofotlanganligi alohida eʼtirof etildi.

Tadbirda bir guruh soha ilg‘orlari “NKMK faxriysi” unvoni va faxriy yorliqlar bilan taqdirlandilar.

“Farhod” madaniyati saroyi badiiy jamoalari va xonandalari tomonidan tuhfa etilgan musiqiy dastur tadbir ishtirokchilariga bayramona kayfiyat ulashdi.

“NKMK” AJ matbuot xizmati.