• Yaratildi: 04.10.2024
• Yangilandi: 04.10.2024
• O'qildi: 880

Kuz-qish mavsumiga tayyorgarlik ishlari olib borilmoqda

Navoiy kon-metallurgiya kombinati mamlakatimizning muhim ishlab chiqarish korxonalaridan biri hisoblanadi. Korxonaning barqaror ishlashini taʼminlashda mavsumiy rejali taʼmirlash ishlari, zarur yoqilg‘i-moylash vositalarini jamg‘arish katta ahamiyatga ega. Sanoat ishlab chiqarish va xizmat ko‘rsatish obyektlarini kuz-qish mavsumiga tayyorlash bo‘yicha kombinat tomonidan joriy yilda zarur mablag‘lar ajratildi.

Hozirgi kunda kombinat balansidagi elektr tarmoqlarining 253 kilometri mavsumga shay holatga keltirilib, 269 ta podstansiya joriy taʼmirlandi. Issiqlik tarmoqlarining 16 kilometri joriy hamda kapital taʼmirlanib, 12 ta qozonxonaning 68 ta qozoni joriy taʼmirdan chiqarildi. Suv taʼminoti obyektlarining 19,2 kilometr tarmoqlari joriy hamda kapital taʼmirlandi, 100 dan ortiq suv nasoslari mavsumga shay holatga keltirildi.

Gaz taʼminoti tizimlarining tarmoqlari hamda 63 ta gaz taqsimlash puntlari ham mavsumga tayyor. Ishlab chiqarish obyektlarining 21 ming metr kvadrat tom qismi joriy va kapital taʼmirlandi. Hozirgi kunda kombinatda 1 800 tonna mazut yoqilg‘isi va 1 000 tonna texnik tuz zahirasi shakllantirildi.     

– Barcha ishlab chiqarish obyektlarida 24 soat faoliyat olib boradigan tezkor avariya guruhlari tuzilib, maxsus texnika va kerakli materiallar ajratilgan. Kombinat ishlab chiqarish tarmoqlarining bir maromda, barqaror, betalofat ishlashi taʼminlanadi. Bunga barcha imkoniyatlar mavjud, – deydi “NKMK” AJ bosh energetigi o‘rinbosari Ikromjon Shukurlayev.

“NKMK” AJ Matbuot xizmati.