• Yaratildi: 10.02.2022
• Yangilandi: 10.02.2022
• O'qildi: 3085

2021-yilda “Dovgiztov” konida qazib chiqarish bo‘yicha rekord natija qayd etildi

Joriy yilning 1-martida “NKMK” AJ Shimoliy kon boshqarmasiga qarashli “Dovgiztov” koni tashkil topganligiga 20 yil to‘ladi. 3-gidrometallurgiya zavodiga oltinga boy maʼdanlarni yetkazib berayotgan konda ekskavator, burg‘ilash uskunasi mashinistlari, navbatchi chilangarlar, elektr chilangarlari, kon ishchilari kabi kasb egalaridan iborat 500 nafarga yaqin ishchi-xodim faoliyat yuritayapti. 

Keyingi yillarda konda investitsion loyihalar doirasida zamonaviy kon texnika va texnologiyalari o‘zlashtirildi. O‘tgan yili zamonaviy texnika –kovshining hajmi 6 kubometr bo‘lgan “Hitachi EX-1200” rusumli ekskavator keltirildi. Mazkur kon texnikasi sutkasiga 8 ming kubmetr kon massasini avtoag‘dargichlarga yuklab bermoqda. Shu bilan birga, siklik oqim texnologiyasi konveyeri 200 metrga uzaytirilishi evaziga ishlab chiqarish hajmi ortdi. Bu bilan, konveyer umumiy uzunligi 1 650 metrga yetib, avtoag‘dargichlar manzili qisqarib, yoqilg‘i tejab qolinmoqda.

2021-yilda kon tashkil topgandan buyon qazib chiqarish bo‘yicha rekord natija qayd etildi. “Dovgiztov” va “Mag‘ribkon” karyerlaridan 33 million kubmetrdan ortiq kon massasi qazib olindi. Kon jamoasi tomonidan bugungi kunga qadar gidrometallurgiya zavodiga jami 216 million tonnadan ziyod maʼdan yetkazib berildi.

“NKMK” AJ matbuot xizmati.