• Yaratildi: 21.01.2022
• Yangilandi: 21.01.2022
• O'qildi: 3004

Hamkorlik yo‘nalishlari muhokama qilindi

Joriy yilning 20-yanvar kuni Rossiyaning Tatariston Respublikasi tejamkor energiya resurslari texnologiyalari markazi vakillari “NKMK” AJ Navoiy mashinasozlik zavodida bo‘lishdi.

Markaz direktorining o‘rinbosari Shamil Bayramov boshchiligidagi delegatsiya zavod sexlarida bo‘lib, ish jarayonlari va ishlab chiqarish quvvatlarini oshirish bo‘yicha olib borilayotgan amaliy ishlar bilan yaqindan tanishdi.

Zavod mutaxassislari ishtirokida rossiyalik mutaxassislar tomonidan ishlab chiqilgan “Tejamkor ishlab chiqarish” texnologiyasi loyihasi taqdimoti o‘tkazildi. Bu loyiha korxonalarda mehnat unumdorligini oshirish, xomashyodan foydalanishdagi yo‘qotishlar va ortiqcha sarf-xarajatlarni aniqlash va bartaraf etishga qaratilganligi bilan ajralib turishi taʼkidlandi.

- Markazimizning asosiy faoliyati korxonalarda ishlab chiqarish samaradorligini oshirishga yo‘naltirilgan loyihalarni ishlab chiqish va hamkorlik asosida ularni tadbiq etishga ko‘maklashishdan iborat. Bu borada dunyoning ko‘plab yirik korxonalari bilan yo‘lga qo‘ygan hamkorligimiz yaxshi samara berayapti. Yangi hamkorlar topish maqsadida O‘zbekistonga keldik, - deydi Tejamkor energiya resurslari texnologiyalari markazi direktori o‘rinbosari Sh.Bayramov.

Tadbirda kelgusida hamkorlikda Navoiy mashinasozlik zavodida amalga oshirilishi zarur bo‘lgan muhim yo‘nalishlar bo‘yicha o‘zaro kengashib olindi.

“NKMK” AJ matbuot xizmati.