• Yaratildi: 03.12.2021
• Yangilandi: 03.12.2021
• O'qildi: 3375

Respublika konchilik va metallurgiya sanoati faxriylari kengashining Navoiy hududiy filiali tashkil etildi

O‘zbekiston Respublikasi Vazirlar Mahkamasining 2021-yilning 20-oktabrdagi “O‘zbekiston Respublikasi konchilik va metallurgiya sanoati sohasida pensionerlar va faxriylarga qulay shart-sharoitlar yaratishga doir qo‘shimcha chora-tadbirlar to‘g‘risida”gi qaroriga ko‘ra, soha tarixida ilk bor O‘zbekiston konchilik va metallurgiya sanoati faxriylari Kengashi va uning joylardagi filiallari tashkil etildi.

Bugun “Navoiy kon-metallurgiya kombinati” AJda mazkur qaror ijrosiga bag‘ishlangan yig‘ilishida “NKMK” AJ boshqaruvi raisi – bosh direktor Quvondiq Sanaqulov Prezidentimiz va Hukumatimiz rahnamoligida mamlakatimiz kon-metallurgiya sanoatida ko‘p yillar mehnat qilgan,  soha rivojiga munosib hissa qo‘shgan mehnat faxriylarini eʼzozlash, ijtimoiy-moddiy, maʼnaviy qo‘llab-quvvatlash borasida amalga oshirib kelinayotgan ishlar tahsinga loyiqligi hamda tashkil etilayotgan yangi filial barcha faxriylarni bir safga birlashtirishini taʼkidladi.

Tadbirda O‘zbekiston konchilik va metallurgiya sanoati faxriylari Kengashi raisi, O‘zbekiston Qahramoni Aleksandr Farmanov kengashning faoliyati, maqsad va vazifalari haqida batafsil maʼlumot berdi.

- Mamlakatimizning eng yirik sanoat korxonasi hisoblangan “NKMK” AJda ijtimoiy himoya yo‘nalishida ham ibratli ishlar amalga oshirilmoqda. Kombinat pensionerlari doimiy eʼtibor va eʼzozda ekanligini bilamiz va havas qilamiz. Bugun tashkil topayotgan hududiy Kengash ana shu ishlarni yangi bosqichga olib chiqishga xizmat qilishi tabiiy. Uning doimiy faoliyat olib borishi har bir faxriy bilan ishlash, keksalar holidan xabardor bo‘lib, tizimli ravishda amaliy yordam ko‘rsatish imkonini beradi, - dedi A.Farmanov.

Shuni alohida taʼkidlash kerakki, konchilik va metallurgiya sanoati pensionerlari va faxriylarining maʼnaviy ehtiyojlarini qondirish, ularning qonuniy huquqlari va manfaatlarini, munosib hayoti va ijtimoiy mavqeini taʼminlash, AJlari hamda respublikaning boshqa konchilik va metallurgiya sanoati korxonalari mehnat jamoalarining hayotida Kengashning hamda har bir pensioner va faxriy ishtirokining roli va ahamiyatini oshirish, pensionerlar va faxriylarning ijtimoiy va moddiy holatini yaxshilash, ularga maishiy, tibbiy, madaniy va boshqa turdagi xizmatlarni ko‘rsatish bo‘yicha amaliy chora-tadbirlarni ishlab chiqish va amalga oshirishda ko‘maklashish, pensionerlar va faxriylarni ijtimoiy himoya qilish choralarini yanada kuchaytirish bo‘yicha takliflarni ishlab chiqishda ko‘maklashish, faxriylar ishtirokida maʼnaviy-maʼrifiy, madaniy, shuningdek, sport tadbirlarini tashkil etish, yoshlar bilan uchrashuvlar o‘tkazish va boshqalar mazkur Kengash va uning hududlardagi filiallarining asosiy vazifasi hisoblanadi.

- Kombinat rahbariyati va kasaba uyushmasi Kengashiga rahmat! Har doim biz, faxriylarni yo‘qlab, tadbirlarga taklif etib turadi. Bu, ayni paytda farzandlar, nabiralar ardog‘ida keksalik gashtini surayotgan biz, pensionerlarga kuch-qudrat beradi. Korxonada faxriylar manfaati yo‘lida faoliyat olib boruvchi filial tashkil etilishi yaxshi ish bo‘ldi. Bu xushxabar 15 ming nafarga yaqin faxriylarimiz qalbiga quvonch, ishonch bag‘ishlagani tabiiy. Endi bizning takliflarimiz, muammolarimizni eshitadigan, hal etishga yaqin kamarbasta bo‘ladigan o‘zimizning filialimiz bor, - deydi Akbar Husainov.

Yig‘ilishda Nishon Muxammatovich Yesirgapovni Respublika konchilik va metallurgiya sanoati faxriylari kengashining Navoiy hududiy filialining rahbari etib tayinlash to‘g‘risidagi taklif bir ovozdan maʼqullandi.

“NKMK” AJ matbuot xizmati.