• Yaratildi: 22.11.2021
• Yangilandi: 22.11.2021
• O'qildi: 2399

Kombinat bo‘linmalarida “Yashil makon” umummilliy loyihasi keng davom etmoqda

Mamlakatimizning barcha hududlarida yashil maydonlarni kengaytirish, joylarda ekologik vaziyat va havo tozaligini yaxshilash borasida O‘zbekiston Respublikasi Prezidenti tomonidan ilgari surilgan “Yashil makon” umummilliy loyihasi doirasida “Dolzarb 40 kunlik” tadbirlari qizg‘in davom etmoqda.

“Yashil makon” umummilliy loyihasiga munosib hissa qo‘shish maqsadida, Navoiy kon-metallurgiya kombinatida mevali va manzarali daraxt ko‘chatlarini ekish bo‘yicha keng miqyosdagi amaliy ishlar boshlab yuborildi. Bunday ezgu ishlar joriy yilning 20-21 noyabr kunlari Navoiy, Zarafshon, Uchquduq, Nurobod shaharlari, Zafarobod, Zarkent, Marjonbuloq qo‘rg‘onlarida, kombinat bo‘linmalari joylashgan hududlarda davom etdi.

Mazkur shahar va qo‘rg‘onlar hududidan tashqarida, kombinatning barcha tarkibiy bo‘lim va bo‘linmalarida, maishiy, ishlab chiqarish, ijtimoiy va yordamchi xo‘jalik binolari yon-atroflaridagi bo‘sh maydonlarda tut, qayrag‘och, saksovul, gujum, jiyda, shumtol, pavloniya, tuya kabi o‘n minglab mevali va manzarali daraxt ko‘chatlari o‘tqazildi. Bunda kombinat bo‘linmlarida mehnat qilayotgan ishchi-xodimlar, muhandis-texnologlar, yoshlar hamda “NKMK jamg‘armasi” davlat muassasasining hududiy boshqarmalari vakillari faol ishtirok etishdi.  

Ko‘chat ekish jarayonida hududning tuproq va iqlim sharoitiga alohida eʼtibor qaratilmoqda. Ko‘chatlarni tomchilatib sug‘orish texnologiyasi orqali parvarishlashni hisobga olgan holda meʼyordan ortiqcha suv talab qilmaydigan daraxt turlari tanlab olingan.

NKMK Matbuot markazi.