• Yaratildi: 01.09.2021
• Yangilandi: 24.11.2021
• O'qildi: 2681

Navoiyda bayram tadbiri

31 avgust kuni Navoiy shahridagi “So‘g‘diyona” o‘yingohida Navoiy kon-metallurgiya kombinati tashabbusi bilan O‘zbekiston Respublikasi davlat mustaqilligining 30 yilligiga bag‘ishlangan bayram tadbiri bo‘lib o‘tdi. Shodiyonada korxona ishchi-xodimlari, ularning oila aʼzolari, navoiyliklar va shahrimiz mehmonlari ishtirok etishdi.

“So‘g‘diyona” o‘yingohiga kiraverishda “Farhod” madaniyat saroyi Bolalar ijodiyoti markazi tarbiyalanuvchilarining ijod namunalari hamda kitoblar ko‘rgazmasi o‘tkazildi.

Bayram avvalida NKMK Kasaba uyushmasi Kengashi raisi I.Rahmatov so‘zga chiqib, barchani Vatanimiz mustaqilligining o‘ttiz yilligi bilan samimiy tabrikladi.

“So‘g‘diyona” jismoniy tarbiya va sport klubi vakillarining chiqishlari, “Farhod” madaniyat saroyi tomonidan tayyorlangan bayram dasturi, sanʼatkorlar va ijodiy jamoalarning Vatan, Mustaqillikni madh etuvchi kuy-qo‘shiqlari o‘yingohga yig‘ilganlarga bayramona kayfiyat bag‘ishladi.

Bayram tadbiri mushakbozlik bilan yakunlandi.

Eng ulug‘, eng aziz bayram kombinat bo‘linmalarida davom etmoqda.

NKMK Matbuot markazi.