• Yaratildi: 21.05.2021
• Yangilandi: 21.05.2021
• O'qildi: 1455

Davlat tilida ish yuritilishi o‘rganildi

Keyingi yillarda Navoiy kon-metallurgiya kombinatida ko‘plab texnik yo‘riqnomalar, terminlar, mehnat xavfsizligi qoidalari, lavozim yo‘riqnomalari kabi hujjatlar davlat tiliga tarjima qilindi. Ularning asosiy qismi lotin yozuviga asoslangan o‘zbek alifbosidadir.

Joriy yilning 19-20 may kunlari Markaziy kon boshqarmasida O‘zbekiston Respublikasining “Davlat tili haqida”gi Qonuni, O‘zbekiston Respublikasi Prezidentining 2019 yil 21 oktyabrdagi “O‘zbek tilining davlat tili sifatidagi nufuzi va mavqeini tubdan oshirish chora-tadbirlari to‘g‘risida”gi Farmoni hamda sohaga oid boshqa qonun hujjatlari talablariga rioya etilishi holati Ishchi guruhi tomonidan o‘rganildi. Jumladan, Moddiy-texnika taʼminot bazasi, Temir yo‘l transporti boshqarmasi, 9-avtokorxona hamda “Auminzo-Amantoy” konida ish yuritish hujjatlari hamda devonxonadagi kirish-chiqish xatlarining davlat tilida yuritilishi, boshqarma binolari va uning hududida joylashtirilgan targ‘ibot vositalari holati hamda maʼnaviy-maʼrifiy ishlar yo‘nalishida olib borilgan ishlar holati o‘rganildi.

O‘rganishlar davomida bo‘linmalardagi kirish-chiqish xatlari, meʼyoriy hujjatlar va targ‘ibot-tashviqot bannerlari, bino peshtoqlari va eshiklaridagi yozuvlar ko‘zdan kechirildi. Aniqlangan kamchiliklar bo‘yicha joyida tasviyalar berildi va ular bartaraf etilib, maʼnaviy eskirgan targ‘ibot vositalari yangisiga almashtirildi.

Markaziy kon boshqarmasi bo‘linmalaridagi kirish joylari, bino peshtoqlaridagi targ‘ibot vositalari lotin yozuviga asoslangan o‘zbek alifbosida yozilgan, ammo bu borada hali ko‘plab ishlarni amalga oshirish kerak, ayniqsa kadrlar, devonxona, hisobxona va xo‘jalik ishlarining yuritilishidagi kamchiliklar borki, ularni bartaraf etish bo‘yicha tavsiyalar berildi.

Kombinatda davlat tilida ish yuritish bo‘yicha masʼul ishchi-xodimlarning malakasini oshirish, tilimizning imloviy qoidalariga oid bilimlarini oshirish masalalariga alohida eʼtibor qaratilmoqda. Shu maqsadda Alisher Navoiy nomidagi O‘zbek tili va adabiyoti universiteti huzuridagi Davlat tilida ish yuritish asoslari va malaka oshirish markazining Navoiy davlat pedagogika instituti huzuridagi markazida o‘quv kurslari tashkil etilib, may oyi oxiriga qadar Markaziy kon boshqarma xodimlarining 31 nafarining malaka oshirishi rejalashtirilgan. Ayni paytda lotin yozuviga asoslangan o‘zbek alifbosida ish yuritish yuzasidan o‘quv mashg‘ulotlari Markaziy kon boshqarmasining O‘quv markazida olib borilmoqda.

X.RAUPOV,

bosh direktor maslahatchisi.