• Yaratildi: 17.01.2025
• Yangilandi: 17.01.2025
• O'qildi: 109

Navoiy kon-metallurgiya kombinatiga xalqaro konsalting kompaniyalari vakillari tashrif buyurishdi

Kombinat boshqarmasida “Navoiy kon-metallurgiya kombinati” AJ rahbariyati va “Rothschild & Co”, “KPMG” kabi yetakchi xalqaro konsalting kompaniyalari hamda “Uzassets” AJ investitsion kompaniyasi vakillari o‘rtasida uchrashuv o‘tkazildi.

Uchrashuvdan ko‘zlangan maqsad tomonlarning o‘zaro hamkorlik imkoniyatlarini muhokama qilish va kombinat faoliyatining asosiy yo‘nalishlari bilan tanishishdan iborat bo‘ldi.

Uchrashuvda “NKMK” AJ Boshqaruvi raisi – Bosh direktori Quvondiq Sanaqulov kompaniyalar vakillarini korxonaning boy tarixi va keyingi yillardagi rivojlanishi bilan tanishtirdi. Hozirgi vaqtda korxona faoliyatining shaffofligi hamda ilg‘or jahon amaliyoti va standartlariga muvofiqligini oshirish maqsadida Navoiy kon-metallurgiya kombinatida keng ko‘lamli transformatsiya amalga oshirilayotganligiga alohida eʼtibor qaratdi.

Shuningdek, “NKMK” AJ Boshqaruvi raisi – Bosh direktori Q.Sanaqulov taʼkidlaganidek, strategik vazifalarga erishish maqsadida kombinat tomonidan ishlab chiqarish quvvatlarini kengaytirishga qaratilgan loyihalar hamda jahon hamjamiyatiga yanada integratsiya qilish bo‘yicha chora-tadbirlarni amalga oshirish davom ettirilmoqda.

“Rothschild & Co” kompaniyasining hamkori Ariel Malar de Rotshild “NKMK” AJ bilan hamkorlik qilishga katta qiziqish bildirib, kompaniyaning uzoq yillik tarixi, boy resurs bazasi va ishlab chiqarishning barqaror o‘sishi, ishlab chiqarilayotgan mahsulot tannarxining pastligi hamda kompaniyaning “yashil” iqtisodiyotni rivojlantirishga qo‘shayotgan hissasi kombinatning muvaffaqiyatli investitsion tarixini shakllantirishdagi muhim jihatlar ekanligini taʼkidladi.

Uchrashuv yakunida tomonlar o‘zlarini qiziqtirgan masalalar yuzasidan fikr almashdilar va kelgusidagi hamkorlik rejasini belgilab oldilar.

Shuningdek, “Rothschild & Co”, “KPMG” yetakchi xalqaro konsalting kompaniyalari hamda “Uzassets” AJ investitsion kompaniyasi vakillari kombinatning Navoiy mashinasozlik zavodiga tashrif buyurib, korxona faoliyati bilan yaqindan tanishdi.

“NKMK” AJ Matbuot xizmati.