• Yaratildi: 16.07.2024
• Yangilandi: 17.07.2024
• O'qildi: 2153

Yuqori aniqlikdagi tahlil usuli

Navoiy kon-metallurgiya kombinati faoliyatida tog‘ jinslari va maʼdandagi qimmatbaho va nodir metallarni aniqlashga mo‘ljallangan geologik namunalarning gamma-aktivlashtirilgan tahlilidan muvaffaqiyatli foydalanilmoqda.

Ushbu tahlil “Muruntov” konidagi Gamma-aktivlashtirilgan tahlil markaziy laboratoriyasida zamonaviy asbob-uskunalar yordamida amalga oshirilmoqda. Gamma-aktivlashtirilgan usuli namunadagi materialni gamma nurlanish bilan faollashtirish va radioaktivlikni o‘lchashdan iboratdir. Maʼdandagi oltin mavjudligiga bog‘liq bo‘lgan nurlanish oltin tarkibini aniqlaydi.

Mazkur tahlil usulining asosiy farqi shundaki, u yuqori tezlikda, keng ko‘lamli tahlil bo‘lib, tahlil jarayonida namuna materiali o‘zgarishsiz qoladi. So‘nggi yillarda laboratoriya quvvati 3,5 barobarga – yiliga 620 mingtadan 2 million tahlilga ishdi. Joriy yilning may oyida laboratoriya tashkil etilgan 1977-yildan buyon tahlil qilingan geologik namunalarning umumiy soni 30 milliondan ortiqni tashkil etdi. 2024-yilda 2,2 million tahlil o‘tkazilishi rejalashtirilgan. Tahlilning tezligi, yaʼni bitta namunaga atigi 18 soniya sarflanishi tufayli yuqori unumdorlikka erishilmoqda.

Taʼkidlash kerakki, bunday hajmdagi tahlillar dunyodagi mavjud sanoat fizik laboratoriyalarining birortasi tomonidan amalga oshirilmaydi, shuning uchun Gamma-aktivlashtirilgan tahlil markaziy laboratoriyasi bugungi kunda ham “noyob laboratoriya” maqomini saqlab kelmoqda.

“NKMK” AJ Matbuot xizmati.