• Yaratildi: 04.05.2024
• Yangilandi: 04.05.2024
• O'qildi: 2114

III Toshkent xalqaro investitsiya forumida “NKMK” AJ delegatsiyasi ishtirok etdi

2-3-may kunlari Toshkent shahrida o‘tkazilgan III Toshkent xalqaro investitsiya forumida dunyoning 93 davlatidan ikki yarim mingdan ortiq xorijiy mehmonlar tashrif buyurishdi. Forumning ochilishida O‘zbekiston Respublikasi Prezidenti Shavkat Mirziyoyev ishtirok etdi.

Forum doirasida xalqaro investorlarga ularning huquqlarini himoya qilishni kuchaytirishga qaratilgan qator aniq tashabbuslar taklif etildi, shu jumladan, “Investitsiyalar to‘g‘risida”gi Qonunga o‘zgartirishlar kiritish, Raqamli texnologiyalar xalqaro markazi huzurida Xalqaro tijorat sudini ochish, xalqaro moliyalashtirish vositalarini rivojlantirish uchun bank-moliya sohasini isloh qilish. Forumda O‘zbekiston mineral-xom ashyo bazasini rivojlantirish muhimligi ham taʼkidlandi. Shu munosabat bilan zamonaviy xalqaro tajribadan kelib chiqib, “Yer qaʼri to‘g‘risida”gi Qonun yangi tahrirda qabul qilinishi kutilmoqda. Raqamli transformatsiya va transport infratuzilmasini rivojlantirishga ham alohida eʼtibor qaratildi.

Xalqaro investitsiya forumi doirasida turli mavzularda 40 dan ortiq yalpi majlislar bo‘lib o‘tdi.

“NKMK” AJ vakillari, xususan, bosh direktorning transformatsiya masalalari bo‘yicha birinchi o‘rinbosari Ye.Antonov “ESG: barqaror biznes va investitsiyalarga yangi yondashuvlar” sessiyasida so‘zga chiqdi. Shuningdek, kompaniya delegatsiyasi xalqaro moliya institutlari vakillari va investorlar bilan bir qator ikki tomonlama uchrashuvlar o‘tkazdi.

“NKMK” AJ Matbuot xizmati.