• Yaratildi: 22.02.2024
• Yangilandi: 22.02.2024
• O'qildi: 3915

OAV vakillari va jurnalistlar uchun matbuot anjumani o‘tkazildi

22-fevral kuni “NKMK” AJning matbuot anjumanlarini o‘tkazish zalida kombinatda ishlab chiqarishni raqamlashtirish, faoliyatga axborot-kommunikatsiya texnologiyalarini joriy etish bo‘yicha olib borilayotgan ishlar, erishilgan natijalar va istiqboldagi rejalar yuzasidan ommaviy axborot vositalari vakillari va jurnalistlar uchun matbuot anjumani o‘tkazildi.

Mamlakatimizda raqamli iqtisodiyotni rivojlantirish, barcha tarmoq va sohalarda zamonaviy axborot-kommunikatsiya texnologiyalarini keng joriy etish maqsadida “Raqamli O‘zbekiston – 2030” strategiyasi izchil amalga oshirilmoqda. Xususan, “Navoiy kon-metallurgiya kombinati” AJda ishlab chiqarish jarayonlariga raqamli texnologiyalar, zamonaviy axborot tizimlari hamda dasturiy mahsulotlarni joriy etish bo‘yicha keng ko‘lamli ishlar olib borilmoqda.

Bugungi kunda kombinat transformatsiyasining ustuvor yo‘nalishlaridan biri korxonaning ishlab chiqarish va boshqaruv jarayonlariga raqamlashtirishni keng joriy etishdir. Bu borada “Boston Consulting Group” (BSG) xalqaro konsalting kompaniyasi vakillarini jalb qilgan holda 12 ta yo‘nalishdan iborat “NKMK” AJning raqamli transformatsiya dasturi amalga oshirilmoqda.

Oxirgi uch yilda Axborot-kommunikatsiya texnologiyalari boshqarmasi mutaxassislari tomonidan 200 ga yaqin ishlab chiqarish va boshqaruv vazifalarini bajaradigan 20 dan ortiq axborot tizimlari ishlab chiqildi. Raqamli transformatsiya dasturi doirasida 2021-2023-yillarda korxonaning ishlab chiqarish va boshqaruv jarayonlariga raqamli texnologiyalarni joriy etish bo‘yicha 40 dan ortiq chora-tadbirlar amalga oshirildi.

Jumladan, 2023-yilda Markaziy kon boshqarmasida ishlab chiqarishning raqamlashtirilgan yagona boshqaruv markazi ishga tushirildi. 2-gidrometallurgiya zavodida joylashgan mazkur markazning asosiy vazifasi geologik-qidiruv ishlari, maʼdanni qazib olish, tashish va gidrometallurgiya zavodlarida qayta ishlash jarayonlarini to‘liq kuzatib borish, tahlil qilish va boshqarishdan iboratdir.

Bu borada olib borilgan ishlar natijasida “NKMK” AJ o‘tgan yilda Toshkent shahrida raqamli texnologiyalar sohasida o‘tkazilgan Markaziy Osiyodagi eng katta tadbirlardan biri – “ICTWeek Uzbekistan - 2023” AKT haftaligida 95,2 ball bilan birinchi o‘ringa muvofiq ko‘rilib, “Raqamli texnologiyalarni joriy etish bo‘yicha eng yaxshi xo‘jalik organi” sifatida taqdirlandi.

Joriy yilda raqamlashtirish loyihalarini amalga oshirish bo‘yicha “BCG” kompaniyasi bilan hamkorlikda ishlab chiqarish va boshqaruv jarayonlarini avtomatlashtirish bo‘yicha 9 ta yirik loyiha amalga oshiriladi. Ushbu maqsadlarga kombinat tomonidan 253,6 mlrd so‘m yo‘naltiriladi. Ko‘plab axborot tizimlari takomillashtiriladi (korxona resurslarini boshqarish (ERP), transport boshqaruvi), yangi 4 ta axborot tizimi (xodimlarni boshqarish HCM, xaridlarni boshqarishni biznes-tahlil tizimi BI, loyihalarni boshqarish tizimi, ekologiya va atrof-muhit muhofazasi sohasini raqamlashtirish (ESG)) joriy etiladi.

Tog‘-kon sanoatida faoliyat yuritib kelayotgan IT sohasidagi 405 nafar xodimning bilim va malakalari oshiriladi, 40 nafar mutaxassis xalqaro taʼlim platformalari orqali o‘qitiladi.

Axborot-kommunikatsiya texnologiyalari keng joriy etilishi kombinatda ish sifati va samaradorligini oshirish, faoliyatga raqamlashtirish tizimini joriy etish orqali inson omilini kamaytirish, tannarxni pasaytirish, ishlab chiqarishda to‘xtalishlar oldini olishni taʼminlamoqda.

Tadbirda OAV vakillari va jurnalistlarning savollariga atroflicha javoblar berildi. 

“NKMK” AJ Matbuot xizmati.