• Yaratildi: 15.02.2024
• Yangilandi: 15.02.2024
• O'qildi: 3673

Markaziy kon boshqarmasi – kombinatning eng yirik bo‘linmasi

Navoiy kon-metallurgiya kombinatida oltin maʼdanlarni qazib olish va qayta ishlash ishlari Markaziy, Shimoliy, Janubiy kon boshqarmalari va “Qizilqum” kon boshqarmasi kabi bo‘linmalarda olib borilmoqda.

Markaziy kon boshqarmasi ishlab chiqarish ko‘rsatkichlari bo‘yicha kombinatning eng yirik bo‘linmasidir. Keyingi yillarda yangi gidrometallurgiya zavodlarini qurish, yangi konlarni o‘zlashtirish, amaldagi kon va zavodlarning quvvatlarini oshirish bo‘yicha yirik investitsion loyihalarning amalga oshirilishi kon boshqarmasida ishlab chiqarish surʼatini oshirishga xizmat qilmoqda.

So‘nggi yetti yilda investitsion loyihalar asosida 5, 7-gidrometallurgiya zavodlari, 2-gidrometallurgiya zavodi ikkinchi navbati ishga tushirilishi, “Muruntov”, “Auminzo-Amantoy”, “Balpantov”, “Tomdibuloq”, “Turbay” konlarida olib borilgan ishlar Navoiy kon-metallurgiya kombinati uchun yangi imkoniyat, istiqbollarni yaratdi.

Buning natijasida Markaziy kon boshqarmasida maʼdan qazib olish 2017-yilda 40 mln tonnani tashkil etgan bo‘lsa, 2023-yilda bu ko‘rsatkich 70,7 mln  tonnaga teng bo‘ldi. Shuningdek, maʼdanni qayta ishlash bo‘yicha ham katta natijalarga erishildi. Xususan, 2-GMZ, Oltinni uyumda ishqorlash sexida 2017-yilda 50,6 mln tonna maʼdan qayta ishlangan bo‘lsa, investitsion loyihalar asosida 5 va 7-GMZ, 2-GMZ ikkinchi navbati ishga tushirilishi hisobiga 2023-yilda bu ko‘rsatkich 84,2 mln tonnaga yetkazildi.

Taʼkidlash kerakki, joriy yilda ham kon boshqarmasida investitsion loyihalarni amalga oshirish, buning hisobiga ishlab chiqarish ko‘rsatkichlarini oshirish bo‘yicha keng ko‘lamli ishlar amalga oshirilmoqda.

 “NKMK” AJ Matbuot xizmati.