• Yaratildi: 07.12.2023
• Yangilandi: 07.12.2023
• O'qildi: 3895

5-gidrometallurgiya zavodida yangi qurilma ishga tushirildi

Qizilqum kengliklarida joylashgan 5-gidrometallurgiya zavodi so‘nggi yillarda mamlakatimizda Navoiy kon-metallurgiya kombinati tomonidan barpo etilgan yirik sanoat korxonalaridan biridir. Kombinat mutaxassislari tomonidan mazkur zavoddagi qimmatbaho metallni qayta ishlashning texnologik jarayonni takomillashtirish bo‘yicha amaliy ishlar amalga oshirilmoqda.

Xususan, korxonada yiliga 5 mln tonna sulfidli va oksidli maʼdan qayta ishlanmoqda. Kuni kecha 5-GMZda maʼdanni qayta ishlash jarayonida oltin ajratib olish darajasini oshirishga qaratilgan Mahsulotni filtrlash, quritish va kuydirish tajriba-sanoat qurilmasi ishga tushirildi.

Ushbu tajriba-sanoat qurilmasini loyihalash ishlari “NKMK” AJ Markaziy loyihalash byurosi mutaxassislari hamda qurilish-montaj ishlari Zarafshon qurilish boshqarmasi quruvchilari tomonidan bajarildi. Qurilmanining asosiy jihoz va uskunalari Navoiy mashinasozlik zavodi, Markaziy kon boshqarmasining Markaziy taʼmirlash-mexanika sexida tayyorlandi.

Taʼkidlash kerakki, qurilmadagi kuydirish jarayonida kimyoviy reaksiyalar hisobiga hosil bo‘ladigan gaz va changlarning atrof-muhitga tasirini oldini olish maqsadida ko‘p bosqichli havoni tozalash uskunalari o‘rnatilgan. Zavodning texnologik jarayoniga tatbiq etilgan tajriba-sanoat qurilma kuydirish hisobiga maʼdandan oltin ajratib olishni sezilarli darajaga oshirish imkonini beradi.   

“NKMK” AJ Matbuot xizmati.