• Yaratildi: 27.11.2023
• Yangilandi: 27.11.2023
• O'qildi: 3224

Amalga oshirilgan ishlar yuzasidan matbuot anjumani o‘tkazildi

27-noyabr kuni “NKMK” AJning matbuot anjumanlarini o‘tkazish zalida Navoiy kon-metallurgiya kombinati tashkil topganligining 65 yilligi munosabati bilan tashkil etilgan tadbirlar, amalga oshirilgan ishlar va erishilgan natijalar yuzasidan ommaviy axborot vositalari vakillari va jurnalistlar uchun matbuot anjumani o‘tkazildi.

Bugungi kunda Navoiy kon-metallurgiya kombinati nafaqat O‘zbekiston sanoatida, balki jahonning oltin ishlab chiqaruvchi yetakchi kompaniyalar qatorida o‘z o‘rni va salohiyatiga ega yirik korxonadir. Korxonada 40 dan ortiq millatga mansub qariyb 50 ming nafar yuqori malakali ishchi, muhandis va mutaxassislar mehnat qilishmoqda.

Joriy yilda kombinat tashkil etilganiga 65 yil to‘ldi. Mamlakatimizda qimmatbaho metallarni qazib olish hamda ularni qayta ishlash rivoji hamda Navoiy, Uchquduq, Zarafshon, Nurobod shaharlari va Zafarobod qo‘rg‘onining barpo etilishi kombinat tashkil topishi bilan chambarchas bog‘liqdir.

Kombinatning 65 yilligi munosabati bilan 17-noyabr kuni Navoiy shahridagi “Farhod” madaniyat saroyida bayram tantanasi bo‘lib o‘tdi. Tantanada O‘zbekiston Respublikasi Bosh vaziri Abdulla Aripov O‘zbekiston Respublikasi Prezidenti Shavkat Mirziyoyevning Navoiy kon-metallurgiya kombinati jamoasiga yo‘llagan bayram tabrigini o‘qib eshittirdi. Davlatimiz rahbarining “Navoiy kon-metallurgiya kombinati” aksiyadorlik jamiyati tashkil etilganining 65 yilligi munosabati bilan ishlab chiqarish ilg‘orlaridan bir guruhini mukofotlash to‘g‘risida”gi Farmoniga muvofiq korxonaning bir guruh ishchi-xodimlariga yuksak davlat mukofotlari topshirildi.

Navoiy, Uchquduq, Zarafshon, Nurobod shaharlari va Zarkent qo‘rg‘onida kombinat ishchi-xodimlari va ularning oila aʼzolari uchun sanaga bag‘ishlangan bayram tadbirlari hamda milliy estradamizning taniqli sanʼatkorlari ishtirokida konsertlar tashkil etildi.

16-17-noyabr kunlari Navoiy davlat konchilik va texnologiyalar universitetida kombinatning 65 yilligiga bag‘ishlab “Zarafshon vohasini kompleks innovatsion rivojlantirish: yutuqlar, muammolar va istiqbollar” mavzusidagi IV xalqaro anjuman o‘tkazildi. Mazkur anjumanda Rossiya, Germaniya, Turkiya, Polsha, Meksika, Chili, Qozog‘iston, Qirg‘iziston, Tojikiston kabi 10 dan ziyod mamlakatlarning yetakchi universitetlari olimlari va xorijiy kompaniyalar vakillari ishtirok etishdi.

Navoiy kon-metallurgiya kombinatining 65 yilligiga bag‘ishlab kombinat tarixi, mustaqillik yillarida, ayniqsa, keyingi yillarda erishilgan yutuqlar, ishga tushirilgan yangi korxonalar, konchilarning fidokorona mehnati, fan-taʼlim va ishlab chiqarish integratsiyasi hamda madaniyat, sport va ijtimoiy sohalarda amalga oshirilayotgan ishlar haqida hikoya qiluvchi fotosuratlardan iborat “NKMK: taraqqiyotning yangi bosqichida” nomli kitob-albom nashr etildi. Shuningdek, kombinat rahbarlari, mutaxassislari, mehnat faxriylari, yoshlarning bugungi kunda korxonada ro‘y berayotgan yangilanishlar haqidagi publitsistik maqolalari o‘rin olgan “Mehnatdan qadr topganlar” nomli kitob chop etildi.

Kombinat tarixida davlatimiz mustaqilligigacha ikkita gidrometallurgiya zavodi barpo etilgan bo‘lsa, mustaqillik yillarida oltita zavod, shundan, to‘rttasi keyingi yetti yilda ishga tushirildi. Jumladan, yiliga 5 mln tonna maʼdanni qayta ishlaydigan 5-gidrometallurgiya zavodi, yiliga 16 mln tonna texnogen chiqindilarni qayta ishlaydigan 7-gidrometallurgiya zavodi, 2-gidrometallurgiya zavodining yiliga 12 mln tonna maʼdanni qayta ishlaydigan ikkinchi navbati kabi zavodlar qatoriga joriy yilda foydalanishga topshirilgan 6-gidrometallurgiya zavodi qo‘shildi.

Jahonga mashhur “Muruntov” koni dunyodagi oltin qazib olinadigan eng yirik konlar ichida yetakchi sifatida eʼtirof etilayotganligi kombinat jamoasi mehnatiga berilgan yuksak bahodir. Shuningdek, 2023-yilda London oltin quymalari bozori assotsiatsiyasi (LBMA – London Bullion Market Association) tomonidan NKMKning yuqori sifatli oltinni ishonchli yetkazib beruvchisi maqomi yana bir bor tasdiqlandi.

O‘zbekiston Respublikasi Prezidenti tomonidan tasdiqlangan Navoiy kon-metallurgiya kombinatini rivojlantirish dasturiga muvofiq korxona tomonidan 2017-2023-yillarda 23 ta yirik investitsion loyiha ishga tushirilib, 15 mingdan ortiq yangi ish o‘rinlari yaratildi. Natijada kombinatda 2023-yilda 2016-yilga nisbatan oltin ishlab chiqarish 25 foiz, kumush ishlab chiqarish 46 foizga oshadi.

O‘zbekistonning 2030-yilgacha bo‘lgan Strategiyasida kon-metallurgiya tarmog‘i korxonalari oldiga katta vazifalar qo‘yilmoqda. Bu borada kombinat jamoasi ham o‘z oldiga katta marralarni qo‘ygan. Kelgusi yetti yilda kombinatda 20 dan ortiq yirik investitsion loyihalarining amalga oshirilishi rejalashtirilgan.

Matbuot anjumanida NKMK tashkil topganligining 65 yilligi munosabati bilan ijodkorlar o‘rtasida o‘tkazilgan ijodiy tanlov g‘oliblari qimmatbaho sovg‘alar bilan taqdirlandi. Mazkur tanlovda kombinat ishchi-xodimlari va barcha ijodkorlar o‘zlarining Yangi O‘zbekistondagi o‘zgarishlar, xalqimiz shukronaligi, korxona yutuqlari, zamonamiz qahramonlarini madh etuvchi publitsistik maqola, ocherk, esse, she’rlar, ko‘rsatuv va eshittirishlar, fotosuratlari bilan qatnashdilar.

Tadbirda OAV vakillari va jurnalistlarning savollariga atroflicha javoblar berildi.

“NKMK” AJ Matbuot xizmati.