• Yaratildi: 27.10.2023
• Yangilandi: 27.10.2023
• O'qildi: 3368

Ishchilar uchun yotohxona va oshxona qurib berildi

IJTIMOIY MASʼULIYAT

“Adjibugut” karyeri Uchquduqdan 200 kilometr olisda, bepoyon cho‘l bag‘rida joylashgan. Ayni paytda bu karyerda konchilar, mashinistlar, geologlar, burg‘ilovchilar va boshqa kasb egalari kunu tun mehnat qilishmoqda.

Navoiy kon-metallurgiya kombinati rahbariyati va kasaba uyushmasi Kengashi tomonidan ishchi-xodimlar uchun zaruriy ish va yashash sharoitlarini yaratish doimiy eʼtiborda. Yaqinda 100 o‘rinli yotoqxona qurib berilgani ular uchun munosib sovg‘a bo‘ldi. Yaqin kunlargacha ishchi-xodimlar “Dovgiztov” konidan ushbu karyerga 60 kilometrlik masofadan qatnab ishlardi. Bu, ishchilarga qiyinchiliklarni tug‘dirib, ishdan keyin ular yo‘lga maʼlum vaqtini sarflashga to‘g‘ri kelardi. Kombinat rahbariyati muammoni bartaraf etishning maqbul va oson yechimini izlab topdi. Karyer hududida yotoqxona qurilib, qulay sharoitlarga ega yashash maskani barpo etildi va foydalanishga topshirildi. Karyer ishchi-xizmatchilari uchun barcha qulayliklarga ega yotoqxona bilan birgalikda, 50 o‘rinli zamonaviy jihozlantirilgan oshxona ham foydalanishga topshirildi.

Bu, nafaqat vaqtni tejash, ishchilarga munosib sharoit yaratish, balki transport xarajatlari va yoqilg‘i-moylash materiallarini iqtisod qilish imkonini berdi. Yotoqxona qurilishi Shimoliy kon boshqarmasi bo‘linmalari tomonidan amalga oshirildi. Yotoqxona tibbiyot bo‘limi, yechinish va kiyinish, yuvinish, kiyimlarni quritish xonalari, zal, yozgi ayvon, kutubxona, maʼnaviyat burchagiga ham ega. Bu qulayliklar ishchi-xodimlarga mazmunli hordiq chiqarish va kuch-g‘ayrat bilan ishga yo‘l olish imkonini berayapti.

 “NKMK” AJ Matbuot xizmati.