• Yaratildi: 28.02.2023
• Yangilandi: 28.02.2023
• O'qildi: 4431

Sarimoylik xotin-qizlar kombinat tomonidan kasbga o‘qitilmoqda

“Navoiy kon-metallurgiya kombinati” aksiyadorlik jamiyati ijtimoiy masʼuliyatni zimmasiga olib, hududlarni ijtimoiy-iqtisodiy rivojlantirish, odamlarni rozi qilish ishlarida ham faol qatnashib kelayapti.

Shu maqsadda, kombinat yangi korxonalar, qo‘shimcha ish o‘rinlari tashkil etib, aholini ish bilan taʼminlashga alohida eʼtibor qaratgan. 2021-yilda Xorazm viloyati Tuproqqalʼa tumanining “Sarimoy” mahallasida 40 ta yangi ish o‘ringa ega payvandlash-mexanika uchastkasi tashkil etilgandi.

Kombinat tashabbusi bilan yaqinda uchastkadagi ish o‘rni yana 40 taga oshirildi. Ayni paytda ushbu ish joylarida faoliyat olib borish uchun “Yoshlar daftari”, “Ayollar daftari”, “Temir daftar”ga kirgan 20 nafar yoshlar, xotin-qizlar va kam taʼminlangan oilalar vakillari Tuproqqalʼa tuman hokimligi tavsiyasi asosida kasblarga o‘qitilmoqda. Ular bir vaqtning o‘zida “NKMK” AJning Zarafshon shahridagi O‘quv markazida uch oylik o‘quv dasturi bo‘yicha kasb sirlarini o‘rganmoqda va Markaziy kon boshqarmasining Markaziy mexanika-taʼmirlash sexida amaliyot o‘tashmoqda. Bo‘lajak kasb egalari kombinat hisobidan maxsus ishchi kiyimi, himoya vositalari va amaliyot o‘tash davrida oylik maosh bilan taʼminlanganlar.

Mazkur xayrli tashabbus kombinatda ishlab chiqarish hajmini oshirish, eng muhimi, ishsiz aholi qatlamini ijtimoiy himoya qilish tizimli olib borilayotganidan dalolatdir.

“NKMK” AJ Matbuot xizmati.