• Yaratildi: 17.02.2023
• Yangilandi: 17.02.2023
• O'qildi: 3932

Germaniyaning “KFW IPEX-Bank” banki delegatsiyasi NKMKga tashrif buyurdi

16-17-fevral kunlari Germaniyaning “KFW IPEX-Bank” banki delegatsiyasi kombinatda amalga oshirilayotgan transformatsiya jarayonlari va ishlab chiqarish faoliyati bilan tanishish maqsadida “Navoiy kon-metallurgiya kombinati” aksiyadorlik jamiyatiga tashrif buyurdi.

“NKMK” AJ boshqarmasida kombinat rahbariyati va bank vakillari o‘rtasida ikki tomonlama muzokaralar bo‘lib o‘tdi. Muzokaralarda amalga oshirilayotgan transformatsiya doirasida kombinat erishgan yutuqlar va istiqbolli rejalar hamda ikki tomonlama hamkorlikni kengaytirish va avval erishilgan kelishuvlarni amalda tatbiq etish masalalari muhokama qilindi.

Taʼkidlash kerakki, tomonlar o‘rtasida ikki tomonlama hamkorlikni yo‘lga qo‘yish bo‘yicha dastlabki qadamlar 2022-yil 3-4-noyabr kunlari Samarqand shahrida o‘tkazilgan II O‘zbekiston iqtisodiy forumi doirasida qo‘yildi. Mazkur forum yakunlariga ko‘ra “NKMK” AJ va “KFW IPEX-Bank” o‘rtasida kombinatning ishlab chiqarish quvvatlarini kengaytirish va modernizatsiya qilish, innovatsiyalarni joriy etish va energiya samaradorligini oshirish yo‘nalishlaridagi investitsiya loyihalarini xorijiy bank tomonidan 100 mln yevro miqdorida moliyalashtirishni tashkil etishni nazarda tutuvchi memorandum imzolangan edi.

Shuningdek, Navoiy kon-metallurgiya kombinatidagi ishlab chiqarish jarayonlari bilan yaqindan tanishish maqsadida, Germaniya banki delegatsiyasi dunyodagi eng yirik oltin konlaridan biri bo‘lgan “Muruntov” konida bo‘ldilar.

Tashrif yakuni bo‘yicha tomonlar kredit shartnomasining keyingi tartibi haqida kelishib oldilar.

 

“KFW IPEX-Bank” 2008-yilda tashkil topgan bo‘lib, KFW Group guruhining sho‘ba bank bo‘linmasi hisoblanadi. Bank faoliyati xalqaro loyihalar va eksportni moliyalashtirishga qaratilgan.“KFW IPEX-Bank” dunyoning ko‘plab yirik kompaniyalar va O‘zbekiston Respublikasidagi yetakchi davlat banklarining moliyaviy hamkori bo‘lib, bankning bosh ofisi Germaniyaning Frankfurt-Mayn shahrida joylashgan.

“NKMK” AJ Matbuot xizmati.