• Yaratildi: 03.02.2023
• Yangilandi: 03.02.2023
• O'qildi: 4815

Malakali kadrlar tayyorlash – muhim vazifa

Navoiy kon-metallurgiya kombinatida kadrlarni tayyorlash, o‘qitish, qayta tayyorlash va malakasini oshirish ishlari tizimli yo‘lga qo‘yilgan. Xususan, Navoiy, Zarafshon, Uchquduq shaharlari, Zarkent qo‘rg‘onida kombinatning yuqori malakali kadrlar tayyorlashga ixtisoslashgan 5 ta o‘quv markazi faoliyat ko‘rsatadi.

Bugungi kunda Zarafshon shahrida joylashgan o‘quv markazda Markaziy kon boshqarmasi bo‘linmalarida ishlaydigan ishchi-xodimlarni kasbga o‘qitish, qayta tayyorlash va malakasini oshirish bo‘yicha keng ko‘lamli ishlar olib borilmoqda. Qariyb 50 nafar xodim faoliyat olib borayotgan o‘quv markazda 225 ta maxsus hamda 123 ta malaka oshirish kurslar tashkil etilgan. 2022-yilda mazkur markazda 5,5 ming nafardan ortiq ishchilar kasbiy taʼlim oldi, qayta tayyorlandi, ikkinchi mutaxassislikka o‘qitildi va malakasini oshirdi. Markazda o‘quv jarayoniga 13 nafar yuqori malakali ishlab chiqarish ustalari hamda muhandislar jalb etilgan.

O‘quv markazda rahbar-xodimlar malakasini turli nufuzli institut va respublika malaka oshirish markazlarida oshirish ham yo‘lga qo‘yilgan. O‘tgan yilda Markaziy kon boshqarmasining bir guruh mutaxassislari Standartlashtirish, sertifikatlashtirish va texnik jihatdan tartibga solish ilmiy-tadqiqot instituti, Biznes va tadbirkorlik oliy maktabi va boshqa muassasalarda malaka oshirdilar.

Bu ishlarning mohiyatida kombinatda muhandis kadrlar zaxirasi shakllanayotgani, ish samaradorligi oshayotgani, sifatli taʼlim olayotgan korxona ishchi-xodimlarining turmush faravonligi yaxshilanayotgani mujassamdir.

“NKMK” AJ Matbuot xizmati.