• Created: 03.05.2021
• Updated: 03.05.2021
• Read: 1292

Xotira bor ekan – millat barhayot

Xalqimizning nuroniy otaxonu onaxonlari qo‘llarini duoga ochganda, albatta yurtimizda tinchlik va xotirjamlik bo‘lishligini so‘rashadi. Tinchlik hukmron bo‘lgan joyda esa shubhasiz barqaror rivojlanish, fayzu baraka bo‘ladi.

Urush o‘zi nomi bilan urush. Bugungi avlod tinchlik zamonida yashab, uning qadriga yetishi lozim. Ikkinchi jahon urushi millionlab insonlarning yostig‘ini quritdi, minglab shahar va qishloqlar vayronaga aylandi. Eng achinarlisi, jangohlarda kimdir otasini, kimdir esa biror yaqin kishisini yo‘qotdi. Xalqimizning Ikkinchi jahon urushi davrida ko‘rsatgan jasorati va sadoqati, Front ortidagi zahmatli mehnatini madh etish yosh avlodda ajdodlar bilan faxrlanish va vatanparvarlik tuyg‘ularini uyg‘otadi.

9 may – Xotira va qadrlash kuni munosabati bilan Navoiy kon-metallurgiya kombinati Maʼnaviyat va maʼrifat markazi NKMK yoshlari yetakchilari Kengashi bilan hamkorlikda “Xotira bor ekan – millat barhayot” mavzusida maʼnaviy-maʼrifiy tadbirlarni tashkil etmoqda. Yaqinda kombinat yoshlari Ikkinchi jahon urushi qatnashchilari karmanalik Pirnazar bobo Turdiyev va navbahorlik Bafo bobo Bahronov xonadonlariga tashrif buyurishdi.

Bugungi kunda pir-badavlat bo‘lib umrguzaronlik qilayotgan otaxonlar urush va undan keyingi suronli yillar, o‘sha davrlarda xalqimiz boshidan kechirgan turli sinovu qiyinchiliklar haqida so‘z ochib, yosh avlodni bugungi tinch hamda osoyishta hayotimizning qadriga yetish, shukronalik bilan yashashga undovchi xotiralari bilan o‘rtoqlashdilar.

NKMK Matbuot markazi.