• Yaratildi: 20.07.2022
• Yangilandi: 06.09.2022
• O'qildi: 4804

Markaziy kon boshqarmasida “Rahbar va yoshlar” uchrashuvi o‘tkazildi

Yosh ishchi-xodimlarning muammolariga yechim topish, izlanuvchan yigit-qizlarni har tomonlama qo‘llab-quvvatlash maqsadida joriy yilning 19 iyul kuni “NKMK” AJ Markaziy kon boshqarmasi majlislar zalida “Rahbar va yoshlar” uchrashuvi o‘tkazildi.

Uchrashuvda Markaziy kon boshqarmasi direktori E.Xalikulov, Zarafshon shahar hokimi N.Raxmanov, kon boshqarmasi masʼullari va yosh ishchi-xodimlari ishtirok etishdi.

Tadbirda so‘zga chiqqanlar O‘zbekiston Respublikasi Prezidenti Shavkat Mirziyoyevning 30 iyunda Yoshlar kuni munosabati bilan mamlakatimiz yoshlari bilan o‘tkazgan uchrashuvda so‘zlagan nutqining mazmun-mohiyatini tushuntirdilar. Yoshlarga barcha sohalarda innovatsion g‘oyalar, taklif va tashabbuslar, yangi loyihalarni amalga oshirish uchun keng ko‘lamli shart-sharoitlar yaratilganligi alohida taʼkidlandi. Uchrashuvda Markaziy kon boshqarmasi yoshlari o‘rtasida “Shaxmat klublari”ni tashkil etish g‘oyasi ilgari surildi.

Tadbirda davlatimiz Rahbarining 2022 yil 29 iyunda imzolangan “Yoshlar kuni munosabati bilan yurtimizning faol va tashabbuskor yosh avlod vakillaridan bir guruhini mukofotlash to‘g‘risida”gi farmoniga muvofiq “Kelajak bunyodkori” medali bilan taqdirlangan 7-gidrometallurgiya zavodi sianlash va sorbsiya sexi boshlig‘i Ulug‘bek Quvondiqovga kon boshqarmasi rahbariyati va shahar hokimligining tashakkurnoma va qimmatbaho sovg‘alari topshirildi.

Shuningdek, faoliyatida tengdoshlariga o‘rnak bo‘lgan yoshlar yetakchilari faxriy yorliq hamda qimmatbaho sovg‘alar bilan taqdirlandilar.

“NKMK” AJ MKB axborot xizmati.