• Yaratildi: 29.04.2022
• Yangilandi: 29.04.2022
• O'qildi: 3061

Yoshlarga oid davlat siyosatini amalga oshirish bo‘yicha brifing

29-aprel kuni Navoiy shahrida "NKMK" AJ yoshlar yetakchilari Kengashi raisi S.Rajabovning “Navoiy kon-metallurgiya kombinati” aksiyadorlik jamiyatida 2022-yilning yanvar-aprel oylari yakunlari bo‘yicha yoshlarga oid davlat siyosatini amalga oshirish bo‘yicha brifingi o‘tkazildi.

Brifingda maʼlum qilinganidek, bugungi kunda “NKMK” AJda 46 minga yaqin ishchi-xodimlar faoliyat yuritib, ularning 13 316 nafari yoki qariyb 30 foizini 30 yoshgacha bo‘lgan yoshlar tashkil etadi. Yoshlarning 1 567 nafari xotin-qizlardir. Kombinatda ishlayotgan yoshlarning 3 135 nafari oliy maʼlumotli bo‘lib, shundan 349 nafari (11 foiz) rahbarlik lavozimlarida, 713 nafari (23 foiz) turli toifalardagi mutaxassislardir. Joriy yilning yanvar-aprel oylarida kombinat bo‘linmalariga jami 671 nafar yoshlar ishga qabul qilindi, shundan 30 nafari xotin-qizlardir.

“NKMK” AJda 2022-yilda yoshlarga oid davlat siyosatini amalga oshirish yuzasidan chora-tadbirlar dasturi tasdiqlangan bo‘lib, dastur 6 ta yo‘nalish va 37 ta banddan iborat. Dasturni amalga oshirish uchun kombinat tomonidan 9,4 mlrd so‘m mablag‘ ajratilgan.  

Joriy yilning yanvar-aprel oylarida mazkur dastur doirasida qator ishlar amalga oshirildi. Jumladan, yoshlarni sportga jalb qilish, sog‘lom turmush tarzini ommalashtirish maqsadida 8 ta sport turlari bo‘yicha 150 ga yaqin sport tadbirlari o‘tkazilib, ularda 5 mingdan ortiq yoshlar qamrab olindi. Yoshlarni intellektual salohiyatini oshirish, yangi bilimlarni orttirishga bo‘lgan qiziqishlarini rivojlantirish maqsadida, “Zakovat” intellektual o‘yini bo‘yicha “NKMK kubogi” turniri doirasida 50 ga yaqin saralash o‘yinlari o‘tkazilib, 100 dan ortiq jamoalar ishtirok etdi va 2 mingga yaqin yoshlar qamrab olindi.

Shuningdek, “Yashil makon” umummilliy loyihasi doirasida “Yashil yillik” umummilliy tadbiri o‘tkazilib, unda kombinat yoshlari tomonidan Orol dengizining qurigan qismida 42 mingdan ortiq saksovul ko‘chatlari o‘tqazildi, Mo‘ynoq shahri atrofida 100 dan ortiq mevali va manazarali daraxtlar ekilib, shahar obodligiga ko‘maklashildi. Undan tashqari yoshlar kombinat bo‘linmalari hududlarida 14 mingdan ortiq mevali, manzarali daraxtlar va buta ko‘chatlari o‘tqazish ishlarida faol ishtirok etdi.

“Ezgulik albatda qaytadi” shiori ostidagi qon topshirish donorlik aksiyasi doirasida kombinatning 117 nafar yoshlari va ishchi-hodimlari tomonidan 23 litrga yaqin donorlik qoni va 25 litrdan ortiq qon plazmasi topshirildi. “Ezgulik yo‘lida birlashaylik” shiori ostidagi aksiya doirasida joylardagi kasaba uyushmasi vakillari ishtirokida ehtiyojmand oilalar, mehnat faxriylari va nogironligi bo‘lgan jami 521 nafar insonlar holidan habar olinib, oziq-ovqat to‘plamlari tarqatildi. Uy yumushlari, obodonlashtirish ishlariga ko‘maklashildi. “Fidoyi yoshlar” aksiya doirasida 900 dan ortiq ko‘ngili yoshlar ishtirokida 37 marotaba qabiriston, masjidlar va qarovsiz qolgan qariyalar xonadonlarida hasharlar uyushtirilib, obodonlashtirish ishlarida ko‘maklashildi.

Yoshlarning yaratuvchanlik, innovatsion yondashuvni shakllantirish, ishlab chiqarish sohasida yangi g‘oyalarni tadbiq qilishga bo‘lgan qiziqishini orttirish maqsadida, “2021-yilning eng yaxshi ratsionalizatorlik taklifi” anʼanaviy tanlovi o‘tkazildi. Tanlovda 35 yoshgacha bo‘lgan 115 nafar yosh ishchi-hodimlar tomonidan 2021-yilda tatbiq qilingan 146 ta ratsionalizatorlik takliflari kelib tushdi. 34 nafar tanlov g‘oliblari jami 62 mln so‘m pul mukofoti bilan taqdirlandi.  

Yoshlarni fikr-mulohazalari, takliflari, ularni qiynayotgan muamolar va murojaatlari yuzasidan bo‘linmalarda 5 marotaba “Rahbar va yoshlar” uchrashuvlari o‘tkazildi, uchrashuvlarda 13 ta taklif va murojaatlar kelib tushdi, shundan 10 tasi qanoatlantirilib, 3 tasiga tushuntirish berildi.

“NKMK” AJ matbuot xizmati.