• Yaratildi: 19.04.2022
• Yangilandi: 19.04.2022
• O'qildi: 2988

“NKMK” AJ faoliyatining 2021-yil yakunlari bo‘yicha matbuot anjumani o‘tkazildi

2022-yil 19-aprel kuni Navoiy shahridagi “NKMK tarixi” muzeyida  “Navoiy kon-metallurgiya kombinati” aksiyadorlik jamiyati faoliyatining 2021-yil yakunlari bo‘yicha ommaviy axborot vositalari vakillari va jurnalistlar uchun matbuot anjumani o‘tkazildi.

Matbuot anjumanida “NKMK” AJ bosh direktorining hodimlar va maʼmuriy masalalar bo‘yicha o‘rinbosari, boshqaruv aʼzosi Qurbunmurat Taparov, byudjetlashtirish va kontrolling bo‘limi boshlig‘i Umidjon Kostayev, jamoatchilik bilan aloqalar bo‘yicha direktor Xolmamat Raupov, OAV vakillari va jurnalistlar ishtirok etishdi.      

O‘zbekiston iqtisodiyotida Navoiy kon-metallurgiya kombinatining o‘rni va  salmog‘i katta. Keyingi yillarda kombinatda yirik investitsion loyihalar amalga oshirilayapti. Bu loyihalar doirasida 2021 yilda 7-gidrometallurgiya zavodi foydalanishga topshirilganligi, 2-gidrometallurgiya zavodida yiliga 12 mln tonna maʼdanni qayta ishlaydigan “B” korpusi ishga tushirilganligi qayd etildi.

“NKMK” AJning respublika sanoat mahsulotlari ishlab chiqarishdagi ulushi 13 foizdan ortiqni tashkil etishi, davlat byudjetiga jami tushumlarining ulushi esa 20 foizga yaqinligi, 2021-yilda kombinat jahondagi oltin ishlab chiqaruvchi kompaniyalar reytingida 5-o‘rinni egallaganligi taʼkidlab o‘tildi.

2021-yilda “NKMK” AJ tomonidan mahsulot ishlab chiqarish hajmi 51,2 trln so‘mga bajarildi. Investitsiya dasturi doirasida 604,5 mln dollarlik mablag‘ o‘zlashtirilib, 3 371 ta yangi ish o‘rinlari yaratildi. Mahalliylashtirish dasturi doirasida 430,4 mlrd so‘mlik mahsulot ishlab chiqarildi va tarmoqlararo sanoat kooperatsiyasi doirasida qariyb 4 trln so‘mlik mahsulot xarid qilindi. Mahsulot tannarxini kamaytirish bo‘yicha kompleks chora-tadbirlar ijrosi natijasida mahsulot tannarxini 1 trln so‘mga yoki 7,3 foizga kamaytirishga erishildi. O‘tgan yilda yuqorida keltirilgan korxona faoliyatining asosiy ko‘rsatkichlari bo‘yicha 2020-yilga nisbatan o‘sish surʼati qayd etildi.   

Matbuot anjumanida OAV vakillari va jurnalistlarning savollariga atroflicha javoblar berildi.

"NKMK" AJ matbuot xizmati.