• Yaratildi: 15.04.2022
• Yangilandi: 15.04.2022
• O'qildi: 2579

Olis hudud aholisi bandligi taʼminlanmoqda

Mamlakatimizda olis cho‘l hududlar aholisi bandligini taʼminlash, xususan Tomdi tumanida yashovchi ishsiz fuqarolarning muammolarini bartaraf etish, yaxshi yashashi uchun qulay shart-sharoitlar yaratish, ularga har tomonlama ko‘maklashish dolzarb vazifalardan biridir.

“Navoiy kon-metallurgiya kombinati” aksiyadorlik jamiyati tomonidan Tomdi tumanida yirik investitsion loyihalar amalga oshirilmoqda. Investitsion loyihalar doirasida yangi ish o‘rinlarini yaratish muhim ahamiyat kasb etadi. Yaqinda shunday loyihalardan birini ro‘yobga chiqarish natijasida “Balpantog‘” va “Tomdibuloq” konlari ochilib, qazib olish ishlari boshlandi.

Joriy yilning 13-aprel kuni “NKMK” AJ Markaziy kon boshqarmasi tomonidan Tomdi tumani Aholi bandligiga ko‘maklashish markazi bilan hamkorlikda mehnat yarmarkasi tashkil etildi. Yarmarkada ijtimoiy himoyaga muhtoj ishsiz fuqarolar ishtirok etishdi. Ular orasida “Temir daftar”, “Yoshlar daftari”, “Ayollar daftari”da ro‘yxatda turadigan fuqarolar ham bor. 50 nafar ishsiz fuqarolarga kon-metallurgiya sohasiga mos bo‘lgan kasb va mutaxassisliklar bo‘yicha ishga joylashish uchun yo‘llanmalar berildi.

Ishga qabul qilinuvchilar Markaziy kon boshqarmasi yetakchi mutaxassislari hamda ko‘p yillik tajribaga ega malakali ishchi-xodimlar ishtirokida shaffoflik va oshkoralik asosida suhbatdan o‘tkazildi. Endilikda ular kon boshqarma o‘quv markazida qayta tayyorlanadi va ushbu fuqarolarning asosiy qismi “Balpantog‘” va “Tomdibuloq” konlarida ishga joylashtiriladi.

Olis cho‘l hududida yashab, mehnat qilayotganlarga ko‘rsatilayotgan alohida eʼtibor va g‘amxo‘rlik tufayli odamlar qalbida hayotdan rozilik, ertangi kunga ishonch tuyg‘ularini uyg‘otmoqda.

 “NKMK” AJ matbuot xizmati.