• Yaratildi: 08.04.2022
• Yangilandi: 08.04.2022
• O'qildi: 4051

Tomdi tumanida ikkita yangi kon ochildi

7-aprel kuni “Navoiy kon-metallurgiya kombinati” aksiyadorlik jamiyati tomonidan amalga oshirilayotgan investitsion loyihalar doirasida Tomdi tumani hududida “Muruntov” koni tarkibida “Balpantog‘” va “Tomdibuloq” konlarining ochilish marosimi va bu yerda birinchi portlatish ishlari amalga oshirildi.

Tadbir ishtirokchilari O‘zbekiston Respublikasi Prezidenti tomonidan kombinatni 2026-yilgacha rivojlantirish dasturida belgilangan loyihalar muvaffaqiyatli  amalga oshirayotganligiga guvoh bo‘ldilar.

“Balpantog‘” va “Tomdibuloq” konlari bazasida qazib olish konchilik korxonasi barpo etilishi, bu yerda yangi ish o‘rinlari yaratilayotganligi mahalliy aholining ertangi kunga bo‘lgan ishonchini oshirmoqda. Yangi konlarning oltin tarkibli maʼdan zaxiralari kombinatning 2-gidrometallurgiya zavodiga 33 kilometrlik temir yo‘llari orqali tashiladi. Tadbirda konlar 40 million tonnadan ortiq maʼdan zaxirasiga ega ekanligi taʼkidlandi.

Konlardan qariyb 15 yil mobaynida yiliga 3 million tonnadan oltinga boy maʼdan qazib olinadi. Bu ishlarni bajarish uchun konga 7 ta gidravlik ekskavator, 5 ta burg‘ilash qurilmasi, 23 ta avtoavg‘dargich, 2 ta teplovoz va boshqa ko‘plab kon texnikalarini xarid qilish ko‘zda tutilgan. Hozirgi kunda bitta zamonaviy gidravlik ekskavatori, 90 tonna yuk ko‘tarish quvvatiga ega 10 ta avtoag‘dargich keltirildi. Bugundan kon yuzasini ochish ishlari boshlandi.

Loyiha doirasida konda 653 ta yangi ish o‘rni yaratiladi.  

“NKMK” AJ matbuot xizmati.