• Yaratildi: 16.03.2022
• Yangilandi: 06.09.2022
• O'qildi: 3824

Kombinat tajribasi tadbirkorlar uchun yangi imkoniyatlar eshigini ochmoqda

“Navoiy kon-metallurgiya kombinati” aksiyadorlik jamiyatining mahalliylashtirilgan mahsulotlar ishlab chiqarish, xususan konstruktorlik va texnologik hujjatlarni ishlab chiqish va taqdim etish, texnik maslahat va amaliy ko‘mak berish, shuningdek, birgalikda mahsulotlar sifatini talab darajasigacha yetkazish ko‘rinishida yangi turdagi import tovarlarini o‘zlashtirish bo‘yicha tadbirkorlik subyektlarini qo‘llab-quvvatlashni nazarda tutuvchi mexanizmi, yaʼni, kombinat tajribasi bugungi kunda keng ommalashmoqda.

Istiqboldagi ishlarni o‘zaro kengashib olish, tajriba almashish, yangidan-yangi imkoniyatlarni izlab topish, mahalliy ishlab chiqaruvchilarni shatakka olish ishlari bundan ikki yil muqaddam boshlangan edi. Ular bilan hamkorlikda olib borilgan samarali ishlar natijasida ko‘plab korxonalar faoliyati kengaydi. Xususan, “Gidro Stanko Servis” ishlab chiqarish tijorat korxonasi va “Navpromlitmash” MChJda ishlab chiqarish hajmi bir necha o‘n baravarga oshdi. Shuningdek, “Aziya-Gormash” MChJ, “Karmana Gold Mayn” xususiy korxonasi, “Ixlas Elektrik” MChJ, “Karmana Sharqona Invest” MChJ kabi yangi korxonalar iqtisodiyotda o‘z o‘rniga ega bo‘lib bormoqda. O‘tgan davrda ushbu korxonalar quvvatlarida reaktor aralashtirgichi, lopastlar, vibratsiyali taʼminlagich, filtr-groxotlar, silindr g‘alvirlar, filtrlash plitalari, elektr va quritish pechlari, yangi turdagi havo filtrlari, burg‘ilash uskunalari, berkitish armaturasi, yoritish jihozlari va boshqalar o‘zlashtirildi.

Joriy yilning 15-mart  kuni Navoiy mashinasozlik zavodida Navoiy shahri va Qiziltepa tumani yirik ishlab chiqaruvchi tadbirkorlari ishtirokida amaliy seminar bo‘lib o‘tdi. Qizg‘in savol-javoblarga boy bo‘lgan tadbirda “NKMK” AJ Boshqaruv raisi – Bosh direktori Q.Sanaqulov tomonidan “shatakka olish” mexanizmini rivojlantirish bo‘yicha rejalar bayon qilindi. Joriy yilning yakuniga qadar tadbirkorlik subyektlari bilan birgalikda yangi turdagi import o‘rnini bosuvchi mahsulotlarni o‘zlashtirish bo‘yicha “Yo‘l xaritalari”ni ishlab chiqish belgilab olindi. “Shatakka olish” mexanizmiga bugungi kunda 10 ta korxona jalb qilingan bo‘lsa, “Yo‘l xaritalari”da ko‘zda tutilgan chora-tadbirlarga muvofiq, 2022-yil yakunida ularning soni ikki barobarga oshiriladi.

“NKMK” AJ matbuot xizmati.