• Yaratildi: 01.03.2022
• Yangilandi: 06.09.2022
• O'qildi: 3094

Konchilar mehnatining eʼtirofi

Muhtaram Prezidentimiz tomonidan belgilab berilgan 2022-2026-yillarga mo‘ljallangan Taraqqiyot strategiyasida, avvalo, mamlakatimizda yaqin kelajakda amalga oshirilajak islohotlarning ustuvor yo‘nalishlari belgilab berildi. Ayniqsa, kon-metallurgiya sanoatida ham keng qamrovli islohotlar olib borilishi kombinat jamoasi oldida ham katta va masʼuliyatli vazifalarni qo‘ymoqda.  Jumladan, “Pistali” koni negizida yiliga 4 million tonna oltin tarkibli maʼdanni qayta ishlaydigan 6-gidrometallurgiya zavodining qurilishi boshlandi. Shuningdek, yaqin yillarda “Nuqrakon” va “Kosmanachi” konlaridan kumush tarkibli maʼdanlarni qazib olish va qayta ishlash majmualari quriladi. Hamda “Turboy”, “Qoraqo‘tan” oltin konlarida maʼdanlarni qazib olish kabi yirik loyihalar amalga oshiriladi.

 “NKMK” aksiyadorlik jamiyati Boshqaruvi raisi – Bosh direktori Q.Sanaqulov “Dovgiztov” koni tashkil topganligining 20 yilligi bayram tadbirdagi tabrik so‘zida shu kabi raqamlar keltirildi. Shuningdek, bir guruh ishchi-xodimlarga "Konchilik shuhrati" ko‘krak nishoni hamda esdalik sovg‘alar topshirildi. Uchquduq tumani hokimi S.Hamroyev ham kon jamoasini qutlug‘ sana bilan tabriklab, esdalik sovg‘alarini taqdim etdi.

Yangilanish fasli – bahorning birinchi kunini kombinat ishchi-xodimlari shunday ko‘tarinkilikda, bayramona ruhda boshladi, desak aslo mubolag‘a bo‘lmaydi. Ertalabdan ishchilar shaharchasi hududida kombinat rahbariyati va jamoatchilik vakillari tomonidan manzaralari daraxt ko‘chatlari o‘tqazildi.

– Kombinat mamlakatimiz sanoatining faxri va eng yirik korxonalaridan biri. Bugun 20 yilligi nishonlanayotgan “Dovgiztov” koni bois bizning mahallamiz obod va fayziyob go‘shaga aylangan, - deydi “Dovgiztov” mahalla raisi Maqsuda Parmonova. – Mazkur kondagi ijobiy o‘zgarishlar yil sayin ko‘payib, aholi turmush sharoiti yaxshilanib borayapti.

Darvoqe, Qizilqum sahrosining bepoyon kengliklarida bundan 20 yil oldin tashkil etilgan “Dovgiztov” konida keyingi yillarda katta o‘zgarishlar ro‘y berdi. Konda investitsion loyihalar doirasida zamonaviy kon-texnika va texnologiyalari o‘zlashtirildi. 2017-yilda ishga tushirilgan siklli-uzluksiz texnologiyasi konda millionlab kubometr tog‘ jinslarini konveyer lentalari yordamida chiqarib bermoqda. O‘tgan 2021-yilda kon tashkil topgandan buyon qazib chiqarish bo‘yicha rekord natija qayd etildi, yaʼni “Dovgiztov” va “Mag‘ribkon” karyerlaridan 33 million kubometrdan ortiq kon massasi qazib olindi. Natijada kon jamoasi faoliyat boshlaganidan bugungi kunga qadar gidrometallurgiya zavodiga 216 million tonnadan ziyod maʼdanni yetkazib berdi.

Tadbirda so‘zga chiqqanlar tomonidan bu kabi yutuqlarni qo‘lga kiritishda konda mehnat qilayotgan tajribali muhandis va mutaxassislar, fidoiy va o‘z kasbining ustalari bo‘lgan turli kasb egalari, ekskavatorchi va haydovchilar, burg‘ilash uskunasi mashinistlari va chilangarlar, qo‘yingki, shu jamoada mehnat qilayotgan har bir kishining mehnati eʼtirof etildi.  

“NKMK” AJ matbuot xizmati.