• Yaratildi: 25.02.2022
• Yangilandi: 25.02.2022
• O'qildi: 3054

OAV vakillari va jurnalistlar Janubiy kon boshqarmasi bo‘linmalarida bo‘lishdi

2022-yil 24-fevral kuni “Navoiy kon-metallurgiya kombinati” aksiyadorlik jamiyati Janubiy kon boshqarmasi bo‘linmalarida olib borilayotgan ishlar bilan tanishish maqsadida, Navoiy va Samarqand viloyatlari ommaviy axborot vositalari vakillari va jurnalistlari uchun press-tur va matbuot anjumani o‘tkazildi.

O‘zbekiston iqtisodiyotida Navoiy kon-metallurgiya kombinatining o‘rni va  salmog‘i katta. Keyingi yillarda kombinatda yirik investitsion loyihalar amalga oshirilayapti. Bu loyihalar doirasida 2021-yilda 7-gidrometallurgiya zavodi foydalanishga topshirilganligi, 2-gidrometallurgiya zavodida yiliga 12 mln tonna maʼdanni qayta ishlaydigan “B” korpusi ishga tushirilganligi qayd etildi.

Navoiy kon-metallurgiya kombinatining respublika sanoat mahsulotlari ishlab chiqarishdagi ulushi 13 foizdan ortiqni tashkil etishi, davlat byudjetiga jami tushumlarining ulushi esa 20 foizga yaqinligi, 2021 yilda kombinat jahondagi oltin ishlab chiqaruvchi kompaniyalar reytingida 5-o‘rinni egallaganligi taʼkidlab o‘tildi.

OAV vakillari “NKMK” AJning Qo‘shrabot tumanining Zarkent qo‘rg‘onida joylashgan 4-gidrometallurgiya zavodi, “Zarmitan” va “G‘ujumsoy” konlarida bo‘lib, ishlab chiqarish jarayonlari va amalga oshirilayotgan loyihalar bilan yaqindan tanishdilar hamda ishchi-xodimlar bilan suhbatlashdilar.

Bugungi kunda 6 ming nafarga yaqin ishchi-xodimlar mehnat qilayotgan Janubiy kon boshqarmasi kombinatning yirik bo‘linmalaridan biridir. Boshqarmaning “Zarmitan” yerosti konining yillik maʼdan qazib olish quvvati 850 ming tonnani tashkil etadi. Konda tarkibida oltin bo‘lgan kvars-sulfidli maʼdan qazib olinadi. Bugungi kunda yer ostidan maʼdan qazib olishda “Epiroc”, “Sandvik”, “Paus”, “Miner” kabi xorij kompaniyalarining eng zamonaviy texnikalari – yerosti o‘ziyurar yuklash va tashish mashinalari, shaxta avtoag‘dargichlari, burg‘ilash qurilmalari va boshqa asbob-uskunalardan keng foydalanilmoqda.

2021-yil avgust oyida “Zarmitan” konining “Asosiy” stvoli maydonida qurilgan shaxta ko‘tarish qurilmasi binosi va stvol kopyori ishga tushirildi. Natijada, “Asosiy” stvol gorizontlariga ishchi-xodimlar, yuklarni tushirish-ko‘tarish va qazib olingan maʼdanni yuqoriga tashish uchun qulayliklar yaratildi. Shu davrgacha ishlatilib kelingan shaxta ko‘tarish eski qurilmasi yer ustki sathidan 300 metr chuqurlikgacha tushardi. Endilikda 930 metr chuqurlikgacha tushish va yer quyi sathlaridagi zaxiralarni yuqoriga – yer ustki qismiga olib chiqish imkonini beradi.

“G‘ujumsoy” konida tarkibida oltin bo‘lgan kvars-sulfidli maʼdan qazib olinadi. 2018-yilda konda chuqurligi 500 metr, aylanasi 6 metr bo‘lgan yangi shaxta ishga tushirildi. Shaxta ishga tushirilishi natijasida “G‘ujumsoy” konining loyiha quvvati 750 ming tonnaga yetdi. 2021 yilda konda maydalash-saralash texnologik tizim va ko‘chma to‘ldirish qurilmasi foydalanishga topshirildi. Ushbu obyekt “G‘ujumsoy” konining ishlab chiqarish quvvatini oshirishga qaratilgan investitsion loyihasi asosida barpo etilgan bo‘lib, kon hududlarida  sodir  bo‘layotgan yer sathining cho‘kishlarini oldini olish va texnika xavfsizligi taʼminlash uchun xizmat qiladi.

2010-yil 30-avgustda Zarkent qo‘rg‘onida ishga tushirilgan 4-gidrometallurgiya zavodi mamlakatimiz mustaqillik yillarida kombinat tomonidan barpo etilgan ikkinchi yirik sanoat majmuasidir. 2010-2021-yillarda 4-GMZning tarkibida oltin bo‘lgan maʼdanni qayta ishlash unumdorligi yiliga 1,8 mln tonnadan 2 mln tonnagacha oshirildi, oltinni ajratib olish ko‘rsatgichi esa 92,2 foizni tashkil etdi. O‘tgan vaqt mobaynida korxonada “Zarmitan” va “G‘ujumsoy” konlaridan qazib olingan 20 mln tonnadan ortiq maʼdan qayta ishlandi.

Geologik tadqiqotlarga ko‘ra, Zarmitan oltin konlarining zaxiralari zavodning 2070-yilga qadar bir maromda ishlashiga yetadi. Hozirgi vaqtda 500 nafardan ziyod ishchi-xodimlar faoliyat ko‘rsatayotgan zavodda eng zamonaviy asbob-uskunalar va texnologiyalaridan keng foydalanilmoqda.

Eng muhimi, bugungi kunda zavod va konlarni mahalliy kadrlar boshqarmoqda. Erishilayotgan barcha yutuqlarda ularning hissalari katta bo‘lmoqda. Matbuot anjumanida OAV vakillari va jurnalistlarning savollariga Janubiy kon boshqarmasi, konlar va zavod rahbar va mutaxassislari tomonidan atroflicha javoblar berildi.

“NKMK” AJ matbuot xizmati.