• Yaratildi: 22.12.2021
• Yangilandi: 22.12.2021
• O'qildi: 3651

3-GMZda yangi texnologiyalar tadbiq etilmoqda

3-gidrometallurgiya zavodi ahil jamoasi 2021-yilni yaxshi iqtisodiy va ishlab chiqarish ko‘rsatgichlari bilan yakunlab, Yangi yilni ko‘tarinki ruhda kutib olayapti.

Korxona ishga tushirilgan dastlabki 13 yilda bu yerda faqat oksidlangan maʼdanlar qayta ishlandi. Oksidlangan maʼdan zaxiralarining kamayishi munosabati bilan 2008-yilda zavodda “BIOX” texnologiyasi asosida sulfidli maʼdanlarni qayta ishlash boshlandi. Oradan uch yil o‘tgach mazkur majmuaning ikkinchi bosqichi foydalanishga topshirildi.

Navoiy kon-metallurgiya kombinati mutaxassislari tomonidan ishlanishi murakkab bo‘lgan sulfid maʼdanlar chiqindilarini qayta ishlash va ulardan qo‘shimcha oltin ajratib olish imkonini beradigan, yangi va noyob texnologiya ishlab chiqildi. Patentlangan bu texnologiyani sanoat ishlab chiqarishiga joriy etish natijasida xomashyodan foydalanish samaradorligini 18 foizga, tayyor mahsulot ishlab chiqarishni esa 17 foizga oshirishga erishildi.

Hozirgi kunda filtrlash, quritish va kuydirish sexining ish unumdorligini oshirish va sorbsiya chiqindisining tarkibidagi oltinni to‘liq va sifatli olish maqsadida kuydirilgan mahsulot bilan laboratoriya sharoitida tadqiqot ishlari o‘tkazildi. Laboratoriya tahlil natijalari tarkibidagi oksidlar va temir gidroksidlar bilan bog‘langan oltinni kislota bilan ishlov berish yordamida ajratib olish imkonini berdi. Zavod mutaxassislari tahlil natijalarini ishlab chiqarishga tadbiq qilish borasida izlanishlar olib bordilar hamda kuydirilgan mahsulotni kislota bilan qayta ishlashning yangi texnologik sxemasini ishlab chiqdilar.

Zavodning salohiyatli mutaxassislari izlanishlarining samarasi o‘laroq ishlab chiqarishda qo‘llanilgan yangilik kuydirilgan mahsulotdan oltin ajratib olishni 3 foizga oshirishga, pirovardida, 3-GMZda tayyor mahsulot ishlab chiqarish hajmini ko‘paytirishga olib keldi. Bunday istiqbolli loyihalar respublikamiz iqtisodiyotini rivojlantirishga daxldorligi bilan alohida ahamiyat kasb etadi.

“NKMK” AJ matbuot xizmati.