• Yaratildi: 11.12.2021
• Yangilandi: 13.12.2021
• O'qildi: 1658

NKMK tajribasi mahalliy korxonalarni qo‘llab-quvvatlashda o‘zining ijobiy samarasini bermoqda

Navoiy kon-metallurgiya kombinati mahalliylashtirilgan mahsulotlar ishlab chiqarish, kooperatsion aloqalarni kengaytirish bo‘yicha yetakchi sanoat korxonasi hisoblanadi. Xususan, gigant korxonada bu borada qabul qilingan farmon va qarorlar, dasturlar ijrosi bo‘yicha tizimli ishlar olib borilmoqda. Buning natijasida kombinat va mahalliy ishlab chiqaruvchilar o‘rtasida kooperatsiya aloqalar yildan-yilga kengayib bormoqda. Bu borada muntazam o‘tkazilib kelinayotgan turli tadbirlar, davra suhbatlari o‘zaro hamkorlik, ishlab chiqaruvchilarni qo‘llab-quvvatlashda muhim ahamiyat kasb etmoqda.

Bugun yo‘lga qo‘yilgan hamkorlikning mantiqiy davomi sifatida “Navoiy mashinasozlik zavodi” ishlab chiqarish birlashmasi majlislar zalida “NKMK” AJ tashabbusi bilan kombinat va viloyatdagi sanoat korxonalari o‘rtasida shatakka olish mexanizmi doirasida olib borilayotgan ishlar va ustuvor vazifalar mavzusida davra suhbati bo‘lib o‘tdi. Unda kombinat rahbar-mutaxassislari, hududiy sanoat korxonalari vakillari ishtirok etdi.

Tadbirda “NKMK” AJ bosh boshqarma boshlig‘i S.Rustamov, bosh muhandis o‘rinbosari K.Dadabayev, bosh mexanik J.Xayitov, Avtomobil transporti faoliyatini muvofiqlashtirish bo‘limi boshlig‘i M.Isroilov, NMZ direktori O‘.Rahmatovlarning maʼruzalari tinglandi. Ular o‘z chiqishlarida kombinatda import o‘rnini bosuvchi mahsulotlarni o‘zlashtirish bo‘yicha mahalliy ishlab chiqaruvchilar bilan kooperatsiya aloqalarini yana-da kengaytirish, innovatsion ishlanmalarni amalga oshirishdagi o‘zaro hamkorlik aloqalari, “shatakka olish” doirasida kichik biznes subyektlariga ko‘mak berishning ijrosi, import o‘rnini bosuvchi mahsulotlarni mahalliylashtirish bo‘yicha olib borilayotgan ishlar haqida axborot berishdi. Mavzu tahlillar asosida keng muhokama etilib, fikr-mulohazalar bildirildi.

Maʼruzalarda taʼkidlanganidek, mamlakatimizda mahalliylashtirish dasturini izchil amalga oshirish, yangi turdagi mahsulot turlarini ko‘paytirish, import o‘rnini bosuvchi raqobatbardosh mahsulotlar ishlab chiqarishga qaratilgan islohotlar olib borilmoqda. Bu borada iqtisodiyot tarmoqlari, tadbirkorlar uchun katta imkoniyat va imtiyozlar yaratib berilmoqda.

Shuni alohida taʼkidlash joizki, joriy yilda Navoiy mashinasozlik zavodida o‘tgan canoat yarmarkasida kombinat tashabbusi bilan joriy etilgan shatakka olish mexanizmi Hukumat miqyosida yuksak eʼtirof etildi. Jumladan, konstruktorlik va texnologik hujjatlarni ishlab chiqish va taqdim etish, texnik maslahat va amaliy ko‘mak berish, shuningdek, birgalikda mahsulotlar sifatini talab darajagacha yetkazish ko‘rinishida yangi turdagi import tovarlarini o‘zlashtirish bo‘yicha tadbirkorlik subyektlarini qo‘llab-quvvatlashni nazarda tutuvchi ushbu mexanizm, yaʼni, kombinat tajribasi bugungi kunda boshqa tarmoq korxonalarida ham keng qo‘llanilmoqda.

- Istiqboldagi ishlarni o‘zaro kengashib olish, tajriba almashish, yangidan-yangi imkoniyatlarni izlab topishimiz uchun bunday davra suhbatlari yaxshi natijalarni beradi, deb o‘ylayman. Mahalliy ishlab chiqaruvchilarni shatakka olish ishlarini bundan ikki yil muqaddam boshlaganmiz. Ular bilan hamkorlikda olib borgan samarali ishlar natijasida ko‘plab korxonalar faoliyati kengaydi. Xususan, “Gidro Stanko Servis” ishlab chiqarish tijorat korxonasi va “Navpromlitmash” MCHJda ham ishlab chiqarish hajmi bir necha o‘n baravarga oshdi. Bu, kombinat tomonidan tatbiq etilgan mexanizmning ulkan samarasidan dalolatdir, - deydi “NKMK” AJ Mahalliylashtirish, ehtiyojlarni rejalashtirish va zaxiralarni boshqarish boshqarmasi boshlig‘i D.Baxranova. - Shuningdek, “Aziya-Gormash” MCHJ, “Karmana Gold Mayn” xususiy korxonasi, “Ixlas Elektrik” MCHJ, “Karmana Sharqona Invest” MCHJ kabi yangi korxonalar iqtisodiyotda o‘z o‘rniga ega bo‘lib bormoqda. O‘tgan davrda ushbu korxonalar quvvatlarida reaktor aralashtirgichi, lopastlar, vibratsiyali taʼminlagich, filtr-groxotlar, silindr g‘alvirlar, filtrlash plitalari, elektr va quritish pechlari, yangi turdagi havo filtrlari, burg‘ilash uskunalari, berkitish armaturasi, yoritish jihozlari va boshqalar o‘zlashtirildi.

O‘rni kelganda alohida taʼkidlash joizki, NKMKda tarmoqlararo kooperatsiya doirasida olib borilayotgan ishlar ham tahsinga loyiqdir. Joriy yilning o‘tgan 11 oyida mahalliy ishlab chiqaruvchilardan 3,7 trillion so‘mlik mahsulot xarid qilinib, o‘sish surʼati 118 foizga taʼminlangani buning isbotidir. Quvonarli jihati, uning 1,4 trillion so‘mi yoki 39 foizi Navoiy viloyati korxonalari hissasiga to‘g‘ri keladi.

Hamkorlik aloqalarini kengaytirishda asosiy savdo maydoni bo‘lgan elektron kooperatsiya portali muhim hisoblanadi. Bundan kombinat ham keng foydalanib kelmoqda. Joriy yilda 337 ta sanoat korxonasi bilan umumiy qiymati 2,1 trillion so‘mlik 2 382 ta shartnoma tuzilib, o‘sish surʼati 125 foizga bajarilgani fikrimizni tasdiqlaydi.

Kombinat 2022-yilda ham bu kabi samarali hamkorlikni izchil davom ettirgan holda, sanoat kooperatsiya doirasida 4,8 trillion so‘mlik mahsulot xarid qilishni rejalashtirgan.

Qizg‘in savol-javoblar boy bo‘lgan davra suhbati yakunida kombinat va mahalliy ishlab chiqaruvchilar yangi istiqbolli rejalarni amalga oshirish yuzasidan o‘zaro kengashib olindi.

Qizg‘in savol-javoblarga boy bo‘lgan davra suhbati yakunida “shatakka olish” mexanizmini rivojlantirish bo‘yicha rejalar bayon qilindi. Joriy yilning yakuniga qadar tadbirkorlik subyektlari bilan birgalikda yangi turdagi import o‘rnini bosuvchi mahsulotlarni o‘zlashtirish bo‘yicha “Yo‘l xaritalari”ni ishlab chiqish belgilab olindi. “Shatakka olish” mexanizmiga bugungi kunda 10 ta viloyat korxonalari jalb qilingan bo‘lsa, “Yo‘l xaritalari”da ko‘zda tutilgan chora-tadbirlarni amalga oshirish natijasida 2022-yilda ularning soni ikki barobarga oshiriladi.

“NKMK” AJ matbuot xizmati.