• Yaratildi: 09.12.2021
• Yangilandi: 09.12.2021
• O'qildi: 487

9-dekabr  – Xalqaro korrupsiyaga qarshi kurashish kuni

Joriy yil 6-noyabrda O‘zbekiston Respublikasi Prezidenti o‘z lavozimiga kirishishga bag‘ishlangan tantanali marosimda kelgusi besh yilga mo‘ljallangan yettita ustuvor yo‘nalishlar haqida to‘xtalib o‘tdi. Xususan, ikkinchi yo‘nalishda adolat va qonun ustuvorligini mustahkamlash, inson qadr-qimmatini taʼminlash vazifalarini qamrab olgan. Shu maqsadda sudlov tizimi va advokatura instituti, huquq-tartibot organlari faoliyatini takomillashtirish nazarda tutilgan. Korrupsiyaga barham berishga davlat va jamiyatning barcha kuch va vositalari safarbar etilishi, bunda aybdorlarni huquqiy javobgarlikka tortish bilan cheklanib qolmasdan, korrupsiyaning sabablarini oldindan bartaraf etish choralarini ko‘rish belgilanganligi muhimdir.

Darhaqiqat, so‘nggi 5 yilda korrupsiyaga qarshi kurashish sohasida qator qonun hujjatlari qabul qilinib, samarali ishlar tashkil etildi. 2017-yil 3-yanvarda O‘zbekiston Respublikasining “Korrupsiyaga qarshi kurashish to‘g‘risida”gi Qonuni qabul qilinib, korrupsiyaga qarshi kurashish sohasidagi munosabatlarni tartibga solishning huquqiy asosi yanada takomillashtirildi.

Mazkur qonun Birlashgan Millatlar Tashkilotining “Korrupsiyaga qarshi Konvensiyasi”ning milliy qonunchilikdagi o‘rnini yana bir bor mustahkamlab, respublikamizda xalqaro integratsiyaga keng miqyosda kirishish bo‘yicha olib borilayotgan islohotlar natijasini ko‘rsatib berdi.

2003-yil 9-dekabrda Meksikaning Merida shahrida Birlashgan Millatlar Tashkilotining Bosh Assambleyasi tomonidan “Korrupsiyaga qarshi Konvensiya”ning imzolanishi munosabati bilan har yili 9-dekabr “Xalqaro korrupsiyaga qarshi kurashish kuni” sifatida nishonlanib kelinmoqda.

Prezidentimizning 2020-yil 29-iyundagi PF-6013-sonli Farmoni bilan korrupsiyaning oldini olish, unga qarshi kurashish sohasida davlat siyosatini shakllantirish va amalga oshirish uchun maxsus vakolatli davlat organi Korrupsiyaga qarshi kurashish agentligi tashkil etildi hamda O‘zbekiston Respublikasi Oliy Majlisi Senati raisi boshchiligidagi O‘zbekiston Respublikasi korrupsiyaga qarshi kurashish Milliy kengashi va uning hududiy kengashlari tashkil etildi.

O‘zbekiston Respublikasi Prezidentining 2021-yil 7-iyundagi PF-6257-sonli Farmoni bilan qabul qilingan “Korrupsiyaga qarshi kurashish bo‘yicha 2021-2022-yillarga mo‘ljallangan davlat dasturi”da belgilangan chora-tadbirlarni tanqidiy muhokama qilib borish Milliy kengash tomonidan amalga oshirilishi belgilandi. Prezidentimizning joriy yil 6-iyuldagi “Korrupsiyaga qarshi kurashish faoliyatini samarali tashkil etishga doir qo‘shimcha chora-tadbirlar to‘g‘risida”gi qarori bilan barcha davlat organlari va tashkilotlarida korrupsiyaga qarshi ichki nazorat tuzilmalari faoliyati yo‘lga qo‘yildi.

Ushbu tuzilmalar korrupsiya holatlarini barvaqt aniqlash va oldini olish, ularning sabab va shart-sharoitlarini bartaraf etish, manfaatlar to‘qnashuviga yo‘l qo‘ymaslik hamda korrupsiyaga nisbatan murosasiz munosabatni shakllantirish choralarini ko‘rish uchun masʼul etib belgilandi. Tuzilmalar faoliyati mustaqilligi va qonuniyligini taʼminlash maqsadida, tuzilma rahbarlarini lavozimiga tayinlash Korrupsiyaga qarshi kurashish agentligi bilan birgalikda o‘tkaziladigan ochiq tanlov asosida amalga oshirilib, lavozimidan ozod etish masalasi Agentlik bilan kelishilishi belgilandi.

2021-yil 8-sentabrda Korrupsiyaga qarshi ichki nazorat tuzilmalari faoliyati to‘g‘risidagi Namunaviy nizom Adliya vazirligida 3319-son bilan ro‘yxatdan o‘tkazildi. Nazorat tuzilmalarining asosiy vazifalari:

- tashkilotning korrupsiyaga qarshi kurashish bo‘yicha faoliyatini takomillashtirish;

- korrupsiyaga oid huquqbuzarliklarni profilaktika qilish va ularga qarshi kurashish;

- korrupsiyaga qarshi kurashish tizimini samarali ishlashini taʼminlash va nazorat qilish nazorat tuzilmalarining asosiy vazifasi hisoblanadi.

Korrupsiyaga qarshi ichki nazorat tuzilmalari faoliyatini Korrupsiyaga qarshi kurashish agentligi tomonidan baholab boriladi.

Yangi O‘zbekistonni barpo etish yo‘lidagi ulug‘vor vazifalarni bajarish masʼuliyatidan kelib chiqib, korrupsiyaga qarshi izchil kurashish har birimizning burchimizdir.

Abdulaziz SOLIYEV,

“NKMK” AJ Komplayens xizmati boshlig‘i.