• Yaratildi: 04.12.2021
• Yangilandi: 06.12.2021
• O'qildi: 2347

Ikki korxona ishchi-xodimlari ko‘chat o‘tqazishda faol qatnashishdi

“Yashil makon” umummilliy loyihasi doirasida “Navoiy kon-metallurgiya kombinati” aksiyadorlik jamiyati va “Navoiy kon-metallurgiya kombinati jamg‘armasi” davlat muassasasi tomonidan eʼtirofga arzigulik keng ko‘lamli ishlar olib borilmoqda.

4-dekabr kuni ikki korxona ishchi-xodimlari tashabbus ko‘rsatib, erta tongdan Karmana tumani hududidagi “Do‘stlik” agrofirmasi hududida ko‘chat ekish ishlarida ishtirok etishdi.

- Mazkur loyiha doirasida 100 ming tup ko‘chat ekishni mo‘ljallaganmiz. Shu davrga qadar ishchi-xodimlar ko‘magida rejadagi 100 ming tupdan ortiq o‘n xildan ortiq mevali va manzarali daraxt ko‘chatlarini o‘tqazishga erishdik. Qadalgan ko‘chatlar parvarishi ham alohida nazoratga olingan. Bugungi hashar ham chakki bo‘lmadi. Tadbirda yuzlab ishchi-xodimlar, muhandis-texnologlar, yoshlar vakillari faol ishtirok etishdi. Ularning faolligida 15 ming tup nihol ekildi, - deydi “NKMK jamg‘armasi” DM bosh direktorining o‘rinbosari S.Altinov.

Shuni mamnuniyat bilan alohida taʼkidlash joizki, kombinat jamoasi nafaqat ishlab chiqarishda, balki yashil maydonlarni yaratishda doimiy faol ishtirok etib kelayapti. O‘tgan yillarda ko‘plab yirik bog‘zorlar barpo etganliklari va bugun uning uzviy davomi bo‘lgan yangi bog‘ yaratganligi buning isbotidir.

- Bog‘ yaratish savob. Kimdir mevasidan, kimdir soyasidan bahramand bo‘ladi. Har bir niholning atrof-muhitga, inson salomatligiga qancha foydasi bor.Tabiat qo‘ynida, quvnoq kayfiyatda, jamoa bilan bir safda keng miqyosda ko‘chat ekish tadbirida ishtirok etganligimizdan mamnunmiz. Hamkasblarimiz ushbuxayrli ishga hissa qo‘shganligini xursandchilik bilan bildirishdi. Albatta, biz ekkan novdalar kunlar kelib yaproq yozadi, bog‘ bo‘ladi. Hozirda barcha bo‘linmalarda ham ko‘chat ekish ishlari qizg‘in davom etmoqda, - deydi “NKMK” AJ Jamoatchilik bilan aloqalar bo‘yicha direktori X.Raupov.

Jumladan, shu kuni “Navoiy mashinasozlik zavodi” ishlab chiqarish birlashmasida ham ko‘chat o‘tqazish tadbiri bo‘lib o‘tdi. Ularning saʼy-harakatlari bilan korxona hududiga minglab mevali va manzarali daraxt ko‘chatlari o‘tqazildi.

“NKMK” AJ matbuot xizmati.