• Yaratildi: 26.11.2021
• Yangilandi: 27.11.2021
• O'qildi: 2902

OAV vakillari uchun press-tur “Muruntov” konida davom etdi

Bugun, kunning ikkinchi yarimida ommaviy axborot vositalari vakillari uchun Markaziy kon boshqarmasidagi “Muruntov” koniga ham press-tur tashkil etildi. Tadbirda Navoiy kon-metallurgiya kombinati vakillari va jurnalistlar ishtirok etishdi.

Press-tur davomida OAV vakillari “Muruntov” konida maʼdan qazib olish hajmini oshirish bo‘yicha olib borilayotgan keng ko‘lamli ishlar bilan yaqindin tanishishdi.

Tadbirda taʼkidlanganidek, bugungi kunda konining uzunligi 4,3 kilometr, kengligi 3,2 kilometr, chuqurligi 650 metrni tashkil etadi. Kondan yiliga o‘rtacha 42 million tonnadan ortiq maʼdan qazib olinmoqda. “Muruntov” koni geologlar tomonidan eng yirik oltin zaxirasiga ega kon sifatida eʼtirof etilib, uning zaxirasi 4,5 ming tonnadan ortiq baholangan. Konni o‘zlashtirishning V navbati kelgusida kon chuqurligini 1050 metrgacha yetkazish va maʼdan qazib olish hajmini yiliga 50 mln tonnaga yetkazish imkonini beradi.

Press-turda “Muruntov” koni boshlig‘i Otabek Ravshanov OAV vakillari savollariga batafsil javob berdi.  

NKMK Matbuot markazi.