• Yaratildi: 09.11.2021
• Yangilandi: 09.11.2021
• O'qildi: 2964

OAV vakillari NKMK kasaba uyushmasi Kengashi faoliyati bilan tanishtirildi

2021-yil 9-noyabr kuni Navoiy shahridagi “NKMK tarixi” muzeyida “11-noyabr – O‘zbekiston kasaba uyushmalari kuni” bayrami munosabati bilan “Yangi O‘zbekiston – yangi kasaba uyushmalari” mavzusida matbuot anjumani bo‘lib o‘tdi.

Matbuot anjumanida Navoiy kon-metallurgiya kombinati kasaba uyushmasi Kengashi raisi Isroil Rahmatov, ommaviy axborot vositalari vakillari ishtirok etishdi.

Tadbirda O‘zbekiston Respublikasining 2020-yil 23-noyabrdagi “O‘zbekiston kasaba uyushmalari kunini belgilash to‘g‘risida”gi Qonuniga muvofiq, 11-noyabr – O‘zbekiston kasaba uyushmalari kuni etib belgilanganligi alohida taʼkidlandi.

NKMK kasaba uyushmasi Kengashi raisi I.Rahmatov maʼruzasida taʼkidlaganidek, kombinatning asosiy boyligi bo‘lgan ishchi-xodimlarni ijtimoiy himoyalashga alohida eʼtibor beriladi. Bu ishlarni amalga oshirishda 73 ming nafardan ortiq aʼzosi bo‘lgan kasaba uyushmasi Kengashi va uning bo‘linmalardagi 6 ta qo‘mitasi, 41 ta boshlang‘ich tashkilotining o‘rni beqiyos. Kengashning asosiy maqsadi kasaba uyushmasi aʼzolarining kasbiy, ijtimoiy, iqtisodiy, maʼnaviy, ekologik, intellektual va qonuniy manfaatlarini himoya qilishdir.

Jumladan, korxonada bugungi kunda ikki ming nafarga yaqin mehnat muhofazasi  vakillari ishlab chiqarish uchastkalari va sexlarida mehnat sharoitlari va uni muhofaza qilish holatlari bo‘yicha doimiy o‘rganishlarni o‘tkazib kelishayapti. Aniqlangan kamchiliklarni zudlik bilan bartaraf etilayotgani taʼkidlandi.

Ishchi-xodimlar, ularning oila aʼzolari va pensionerlarni sog‘lomlashtirish kasaba uyushmasi Kengashi faoliyatining muhim yo‘nalishlaridan biri sanaladi. Navoiy shahrida “Metallurg”, Uchquduq shahrida “Konchi” sanatoriy-profilaktoriysi, Nurobod shahrida “Nurobod” balneologik sanatoriysi, Bo‘stonliq tumanidagi “Zarafshon” pansionati, Zomin tumanida “NKMK” sanatoriysi faoliyat ko‘rsatadi. “To‘dakul” oromgohi esa mavsumiy dam olish uchun mo‘ljallangan. Ushbu sanatoriy, pansionat va dam olish maskanlarida har yili imtiyozli yo‘llanmalar bilan kombinatimizning 14-15 ming nafardan ortiq kombinat ishchi-xodimlari va ularning oila aʼzolari dam olishmoqda.

NKMK  tizimida  xodimlarning  farzandlari yozgi  taʼtil  vaqtida  dam  olishlari  uchun  kasaba  uyushma Kengashi  tomonidan  shahardan  tashqarida 6 ta – “Zarafshon”, “Sarmish”, “So‘g‘diyona”, “Bolajon”, “Pahlavon”, “Kelajak”, shahar ichida 3 ta – “Tabassum”, “Yulduz”, “Bulbulcha” kabi bolalar sog‘lomlashtirish oromgohlari  va  yuqori  sinf  o‘quvchilari  uchun  2 ta mehnat  va  dam  olish  oromgohlari, jami 11 ta bolalar sog‘lomlashtirish oromgohlari tashkil qilingan. Ularda har yili yoz mavsumida 11 ming nafarga yaqin bolalar sog‘lashtiriladi.

Kombinatda sport-sog‘lomlashtirish tadbirlarini tashkil etish uchun barcha shart-sharoitlar muhayyo etilgan. Korxona bo‘linmalarida zamonaviy o‘yingohlar, suzish baseynlari, sport saroyi, jismoniy tarbiya-sog‘lomlashtirish majmuasi, 90 ta zal faoliyat ko‘rsatayapti. Sunʼiy qoplamali yangi mini futbol maydonlari qurilmoqda. Kombinatda 9 ming nafar ishchi-xizmatchilar va ularning oila aʼzolari sport bilan muntazam shug‘ullanishmoqda. To‘rt ming nafarga yaqin bolalar sport to‘garaklarida qatnashmoqdalar.

 

Matbuot anjumanida NKMK kasaba uyushmasi Kengashi faoliyati, olib borilayotgan ishlari, erishilayotgan yutuqlari, kelajdaki rejalari haqida batafsil maʼlumot berildi hamda videolavha namoyish etildi.

Tadbirda OAV vakillari va jurnalistlar savollariga atroflicha javoblar berildi hamda anjuman mavzusiga oid takliflar bildirildi.

NKMK Matbuot markazi.