• Yaratildi: 04.11.2021
• Yangilandi: 04.11.2021
• O'qildi: 4337

Navoiy mashinasozlik zavodida ishlab chiqarish quvvatlari kengaytirilmoqda

Bugungi kunda Navoiy kon-metallurgiya kombinatini 2017-2026 yillarda rivojlantirish dasturi bosqichma-bosqich ro‘yobga chiqarilmoqda. Korxona bo‘linmalarining texnologik va kon uskunalari uchun ehtiyot qismlarga bo‘lgan talabini kondirish maqsadida Navoiy mashinasozlik zavodida mahalliylashtirilgan mahsulotlar ishlab chiqarish hajmini yanada oshirishga qaratilgan amaliy ishlar olib borilmoqda.

Zavodda umumiy qiymati 22 mln dollardan ortiq bo‘lgan “Mexanik yig‘uv sexini texnik va texnologik qayta jihozlash” loyihasi amalga oshirilmoqda. Mazkur loyiha bo‘yicha bugungi kunda sexning yangi binosi qurilishi yakunlanish arafasida. Hamda zamonaviy, samaradorligi yuqori dastgohlar olib kelinib, ishga tushirishga tayyorlanmoqda.

Shu bilan birga, kombinat bo‘linmalarida sharli tegirmonlar va kon-shaxta uskunalari uchun quymachilik sexida ishlab chiqarilgan mahsulotlar hajmini oshirish uchun joriy yilda ushbu sexda quyma mahsulotlari hajmini 31 ming tonnaga, 2026 yilga kelib bu ko‘rsatkichni 40 ming tonnaga yetkazish rejalashtirilgan. Hozir quymachilik sexida qurilish va rekonstruksiya ishlari jadal surʼatlarda olib borilmoqda. Jumladan, 25 tonnalik metall erituvchi pech, zamonaviy pnevmotransportyorlar, qoliplash mashinalari, 25 taga yaqin nostandart jihozlar NMZda ishlab chiqarilib, o‘rnatilmoqda.

Zavodning avtotaʼmirlash sexida kombinat bo‘linmalarida foydalanilayotgan “MAN” va “ISUZU” yuk tashish avtomashinalarini kapital taʼmirlash uchastkasini ochish ko‘zda tutilgan. Shuningdek, mazkur sexda yangi konveyer transportyorlari uchun roliklar ishlab chiqarish uchastkasi ishga tushirildi. Ushbu uchastkada yiliga 36 mingtadan ortiq rolik ishlab chiqariladi.

2022-2024 yillarda kombinat Investitsiya dasturi doirasida Navoiy mashinasozlik zavodida dastgohsozlik sohasini rivojlantirish bo‘yicha qo‘shimcha 28 ta zamonaviy, yuqori aniqlikdagi dasgohlarni xarid qilish rejalashtirilgan. Kelajakda chet el kompaniyalari bilan hamkorlikda kooperatsiya yo‘nalishida zamonaviy, jahon talablariga mos keladigan raqamli dasturlash boshqaruviga ega dastgohlarni ishlab chiqarish va 200 ta yangi ish o‘rinlarini yaratish rejalashtirilgan.

NKMK Matbuot markazi.