• Yaratildi: 29.10.2021
• Yangilandi: 29.10.2021
• O'qildi: 1959

Kombinat vakillari Prezident maktabiga bordi

Bugun yurtimizda yosh avlod kamoloti, ularning puxta bilim olishi, o‘z iqtidor va salohiyatlarini to‘laqonli yuzaga chiqarish uchun barcha imkoniyatlar yaratib berilmoqda. Viloyatlar markazlarida Prezident maktablari tashkil etilishi ana shunday eʼtibor namunasidir. Navoiy shahridagi eng so‘lim va gavjum joyda zamonaviy ko‘rinishga ega Prezident maktabi qad rostladi.

Mazkur nufuzli o‘quv dargohi o‘quvchilar puxta bilim olishi, bo‘sh vaqtlarini mazmunli o‘tkazishi, dam olishi va ovqatlanishi uchun o‘zining mustahkam bazasiga ega. Ayniqsa, maktab tashqi ko‘rinishi, manzarali daraxt ko‘chatlari va gullarga bezangan hovlisi, har bir qavatdagi o‘ziga xos betakrorlik inson qalbiga quvonch bag‘ishlaydi.

Prezident maktabi faoliyati bilan tanishish maqsadida, Navoiy kon-metallurgiya kombinati va Navoiy davlat konchilik instituti bir guruh rahbar-mutaxassislari, o‘qituvchi-professorlar ushbu maktabda bo‘lishib, o‘quvchilarga yaratilgan zamonaviy shart-sharoitlar bilan yaqindan tanishishdi.

Prezident maktabi direktori D.Tuxfatullina maktabga xorij va mamlakatimizning turli hududlaridan salohiyatli o‘qituvchilar ishga taklif etilgani, tanlov asosida ilmga chanqoq  o‘quvchi-yoshlar qabul qilingani va ayni paytda mashg‘ulotlar boshlab yuborilgani yosh avlodga bugungi eʼtibor kelajakda albatta, o‘zining ijobiy mevasini berishini mamnuniyat bilan taʼkidladi.

Maktab yuqori sinf o‘quvchilari bilan o‘tgan muloqotda NKMK bosh direktorining maslahatchisi X.Raupov, NKMK yoshlar yetakchilari Kengashi raisi S.Rajabov, Navoiy davlat konchilik instituti yosh olimlari – texnika fanlari doktori, professor Sh.Aliqulov va texnika fanlari bo‘yicha falsafa (PhD) doktori O.Fuzaylovlar mamlakatimizda yoshlarga yaratilayotgan keng imkoniyatlar, Navoiy kon-metallurgiya kombinatida keyingi yillarda amalga oshirilgan investitsion loyihalar, yangi texnologiyalarning joriy etilayotganligi, ishga tushirilgan zavodlar hamda kelgusidagi rejalar, yosh olimlarning ilmiy ishlari to‘g‘risida maʼlumot berishdi. Muloqot qizg‘in savol-javoblarga boy bo‘ldi.

Suhbat yakunida shunday nufuzli maktabda taʼlim olish baxtiga erishgan yoshlar keng sharoitlarni yaratib berayotgan Yurtboshimizga o‘z minnatdorchiliklarini bildirishib, Prezident maktabi o‘quvchisi, degan sharafli nomga munosib bo‘lishlarini aytishdi.

NKMK Matbuot markazi.