• Yaratildi: 24.08.2021
• Yangilandi: 24.08.2021
• O'qildi: 3291

Investitsion loyiha jadal surʼatlarda olib borilmoqda

Shuningdek, 23 avgust kuni O‘zbekiston Respublikasi davlat mustaqilligining 30 yilligi oldidan Navoiy kon-metallurgiya kombinati Markaziy kon boshqarmasi “Muruntov” konida konni o‘zlashtirishning V-navbati investitsion loyihasi doirasida Shimoliy-sharqiy davriy oqim texnologiyasi majmuasini foydalanishga topshirish marosimi bo‘lib o‘tdi.

“Muruntov” koni yurtimiz faxri, korxonamiz iftixori va asosiy xomashyo bazasi hisoblanib, dunyo konlari o‘rtasida peshqadamlik qilib kelmoqda. Xalqaro “Kitco” tahliliy markazi maʼlumotlariga ko‘ra, 2020 yilda “Muruntov” koni oltin qazib olish bo‘yicha jahonda yetakchi bo‘ldi. Shuningdek, nufuzli “Forbes” nashri O‘zbekistonda maydoni bo‘yicha dunyodagi eng yirik ochiq oltin koni – “Muruntov” koni joylashganligi hamda ushbu kon dunyodagi eng yirik oltin zaxirasiga ega bo‘lishi mumkinligini qayd etdi. 

Hozirgi kunda bu kon geologlar tomonidan eng yirik oltin zaxirasiga ega kon sifatida eʼtirof etilib, uning zaxirasi 4 ming tonnadan ortiq baholangan. Konning uzunligi 4,3 km, eni 3,2 km hamda bugungi kundagi chuqurligi 650 metrga yaqin. Hozirgi vaqtda ushbu kondan yiliga 42 mln tonnadan ortiq maʼdan qazib olinayotgan bo‘lsa, 2026 yilda bu ko‘rsatkichni 50 mln tonnaga yetkazish ko‘zda tutilgan. Kelgusida undan 1000 metrgacha chuqurlikda oltin qazish rejalashtirilgan. 

Shu maqsadda, ayni paytda qiymati 733,9 mln dollar bo‘lgan va qariyb 1,8 mingta yangi ish o‘rini yaratish imkonini beruvchi “Muruntov” konini o‘zlashtirishning V-navbati” investitsion loyihasi jadal surʼatlarda olib borilmoqda. Mazkur loyihaning I-bosqichida konning Shimoliy-sharqiy davriy oqim texnologiyasi majmuasi foydalanishga topshirildi. Ushbu majmua yordamida tarkibida oltin bo‘lgan maʼdan maydalanadi, qayta yuklash punktidan konveyerlar orqali tashiladi va buning natijasida avtotransport xarajatlari kamaytiriladi.

Tadbirda Navoiy kon-metallurgiya kombinati bosh direktori Q.Sanaqulov, kombinat rahbariyati va mutaxassislari, ommaviy axborot vositalari vakillari ishtirok etishdi.

NKMK Matbuot markazi.