• Yaratildi: 19.08.2021
• Yangilandi: 19.08.2021
• O'qildi: 3623

Yer osti konlarda yangi obyektlar ishga tushirildi

Joriy yilning 18 avgust kuni O‘zbekiston Respublikasi davlat mustaqilligining 30 yilligi oldidan Navoiy kon-metallurgiya kombinati Janubiy kon boshqarmasiga qarashli yer osti konlarida ishlab chiqarish obyektlari foydalanishga topshirildi.

Tadbirlarda Navoiy kon-metallurgiya kombinati rahbariyati, soha mutaxassislari, ommaviy axborot vositalari xodimlari va jurnalistlar ishtirok etishdi.

Mustaqillik yillarida kombinatning yirik bo‘linmalaridan biri – Janubiy kon boshqarmasiga qarashli korxonalar joylashgan Samarqand viloyati Qo‘shrabot tumanidagi Zarkent qo‘rg‘onida NKMK tomonidan ulkan ishlar amalga oshirildi. 2010 yilda 4-gidrometallurgiya zavodi ishga tushirildi, yangi kon va shaxtalar barpo etildi. Mazkur hududda 4-GMZning barpo etilishi bilan bu yerda Zarkent qo‘rg‘oni obod, zamonaviy qiyofa kasb etdi. Aholini, ayniqsa yoshlarni ish bilan taʼminlash barobarida ularning munosib hayot kechirishlari uchun barcha qulayliklarga ega ko‘rkam uy-joylar va ijtimoiy soha obeʼktlari barpo etildi. Bunday amaliy ishlar davom ettirilayapti.

Qutlug‘ bayram arafasida “G‘ujumsoy” konida maydalash-saralash texnologik tizim va ko‘chma to‘ldirish qurilmasi foydalanishga topshirildi. Ushbu obyekt “G‘ujumsoy” konining ishlab chiqarish quvvatini yiliga 100 ming tonna (650 ming tonnagacha) ruda qazib olishga oshirish” investitsion loyihasi asosida barpo etilgan bo‘lib, kon  hududlarida  sodir  bo‘layotgan  yer sathining cho‘kishlarini  oldini olish va texnika xavfsizligi taʼminlash uchun xizmat qiladi.  

Shuningdek, qiymati 8,7 mln dollar bo‘lgan “Zarmitan” konining “Asosiy” stvoli maydonida qurilgan shaxta ko‘tarish qurilmasi binosi va stvol kopyori ishga tushirildi. Buning natijasida “Asosiy” stvol gorizontlariga ishchi-xodimlar, yuklarni tushirish-ko‘tarish va qazib olingan maʼdanni yuqoriga tashish uchun qulayliklar yaratiladi. Shu davrgacha ishlatilib kelingan shaxta ko‘tarish eski qurilmasi yer ustki sathidan 300 metr chuqurlikgacha tushardi. Endilikda 930 metr chuqurlikgacha tushish va yer quyi sathlaridagi zaxiralarni yuqoriga – yer ustki qismiga olib chiqish imkonini beradi.

Tadbirlardada mazkur obyektlarni foydalanishga topshirishda munosib hissasini qo‘shgan muhandis-texnologlar, quruvchi va ishchi-xodimlar mehnati eʼtirof etilib, ularga esdalik sovg‘alari topshirildi.

NKMK Matbuot markazi.