• Yaratildi: 04.08.2021
• Yangilandi: 04.08.2021
• O'qildi: 2267

Har bir murojaat doimo eʼtiborda bo‘ladi

Shu yil 23 iyul kuni muhtaram Yurtboshimiz raisligida aholi murojaatlari bilan ishlash tizimini yangicha tashkil qilish chora-tadbirlari bo‘yicha videoselektor yig‘ilishi bo‘lib o‘tdi. Yig‘ilishda murojaat etishga majbur qilayotgan masalalarni mahallaning o‘zida hal etish lozimligi, murojaatlar bilan ishlash barcha darajadagi rahbarlarning kundalik ishiga aylanishi, jumladan, hokimlar haftada ikki kunni fuqarolarni qabul qilishga ajratishi, shuningdek, hokimliklarda kunlik qabul yo‘lga qo‘yilishi, har bir hokimning kabineti “Xalq qabulxonasi” bo‘lishi, murojaatlarni ko‘rib, nimalarga eʼtibor qilish bo‘yicha har bir rahbarning strategiyasi bo‘lishi, aholi to‘g‘ridan-to‘g‘ri tunu kun murojaat qilishi uchun hokimlarning virtual qabulxonasi va ijtimoiy tarmoqlarda alohida sahifalarini tashkil etish yuzasidan aniq vazifalar belgilab berildi.

Bundan tashqari, endi murojaatlarning barchasi yagona elektron bazada jamlanib, xalq qabulxonalari har chorakda davlat organlarining ochiq reytingini shakllantirishi, barcha idoralarda murojaatlarni ro‘yxatga olish, ularni ko‘rib chiqish va natijasini nazorat qilish bo‘yicha Yagona onlayn platforma yaratish, u orqali monitoring yuritilib, har oyda Senatga va Hukumatga tahliliy maʼlumot kiritish va buni tanqidiy muhokama etib borish masalasi ilgari surildi. Shuningdek, aholi murojaatlarida ko‘tarilayotgan masalalarni hal etish bo‘yicha tegishli rahbarlar hisobotini Senatda har chorakda, mahalliy hokimliklar hisobotini esa mahalliy Kengashlarda har oyda eshitib borish amaliyoti yo‘lga qo‘yilishi belgilandi. Bunday ishlar bardavomligi, hech shubhasiz, xalqimizda davlatimizdan rozi bo‘lishni taʼminlaydi, ertangi kunga umid va ishonch tuyg‘usini uyg‘otadi.

Shuni mamnuniyat bilan taʼkidlash joizki, davlatimiz rahbari Prezident lavozimiga kirishgan ilk kundan boshlab: xalq davlat organlariga emas, balki davlat organlari xalqimizga xizmat qilishi kerak, degan tashabbusni olg‘a surgan edi. Bu esa o‘z navbatida hayotimizning aholi muammolarini hal etish, xalqni rozi etishdek ezgu g‘oyani chuqur mujassam etgan muhim yo‘nalishlaridan biriga aylandi. Hech vaqt o‘tmasdan xalqimiz boshlangan ishlarning natijalarini seza boshladi. Davlatimiz siyosatining ustuvor yo‘nalishi bo‘lgan yangi tizimni joriy etish yuzasidan bir qator yangi qonun hujjatlari qabul qilindi. Ularga ko‘ra, O‘zbekiston Respublikasi Prezidentining Xalq qabulxonalari va Virtual qabulxonasi tashkil etildi. Aholi va idoralar o‘rtasida yangicha tizim joriy etildi. Xalq bilan uchrashuvlar, jonli muloqotlar va sayyor qabullar yo‘lga qo‘yildi. Davlat muassasalari rahbarlari pastga tushib, xalq muammolari bilan ishlay boshladi. O‘tgan davr mobaynida kelib tushgan murojaatlar tahlili qator hayotiy islohotlarni boshlab berdi. Murojaatlarning aksariyati ijobiy hal etilishi ayni xalqimiz ko‘nglidagi ish bo‘ldi.

Jismoniy va yuridik shaxslar murojaatlari bilan ishlash borasida so‘nggi to‘rt yilda Navoiy kon-metallurgiya kombinatida ham o‘ziga xos tajriba maktabi shakllandi. Jumladan, 2017 yilda NKMK Jismoniy va yuridik shaxslarning murojaatlari bilan ishlashni nazorat qilish va muvofiqlashtirish bo‘limi – “Virtual qabulxona”si tashkil etildi. Aholi murojaat etishi uchun qulayliklar yaratish, ochiqlik va shaffoflikni taʼminlash maqsadida, korxona nkmk.uz rasmiy veb-saytida jismoniy va yuridik shaxslarni qabul qilish jadvali va tartibi har yili eʼlon qilinib kelinmoqda. Bundan tashqari, rahbariyatning sayyor qabullarini o‘tkazish reja-jadvali ham tasdiqlanib, muntazam ravishda qabullar tashkil etilmoqda. Bularning barchasining zamirida inson manfaatlari har narsadan ustun, degan ezgu g‘oya mujassamdir.

Kombinatda murojaatlar bilan ishlash bo‘yicha aniq mezonlar belgilab olingan. Shaxsiy va sayyor qabullar, ochiq muloqotlar o‘tkazish rejasi ishlab chiqilib, ijroga qaratilgan. Murojaatlar ijrosi bo‘yicha monitoring ishlari yo‘lga qo‘yilgan. Buning pirovardida murojaatlarni ko‘rib chiqish qatʼiy tartib asosida olib borilmoqda. Har oy yakuni bilan murojaatlar ijrosining natijadorligi sarhisob qilinmoqda. Qonun talablarini buzgan mutasaddilarga nisbatan taʼsirchan choralar ko‘rilmoqda. Misol uchun, joriy yilning o‘tgan davrida  20 nafar rahbar va masʼul xodimlarga nisbatan intizomiy javobgarlik qo‘llanilgani fikrimiz tasdig‘idir.

Maʼlumki, hayot bardavom ekan, shunga yarasha tashvishlar ham tugamaydi. Bu – hayot qonuniyati. Bunday pallada kimdir ko‘makka ehtiyoj sezadi. Albatta, tashvishli davrida xalq dardiga darmon bo‘lish, har bir murojaat ortida inson taqdiri yotganligini inobatga olib, birinchi navbatda ularni tinglash, muammosini hal etish davlat idoralari, har bir rahbarning muqaddas burchidir. Natijada asosiy eʼtiborni murojaatlarni ijobiy hal etish masalasiga qaratib kelayapmiz. Tahlillarga keladigan bo‘lsak, joriy yilning o‘tgan olti oyi davomida kombinatga jami 1693 ta murojaat kelib tushgan bo‘lib, ularning 1099 tasi O‘zbekiston Respublikasi Prezidentining Virtual qabulxonasi, 7 tasi O‘zbekiston Respublikasi Bosh vazirining Tadbirkorlarning murojaatlarini ko‘rib chiqish qabulxonasi orqali kelib tushgan, 417 tasi yozma murojaatlar, 66 tasi rahbariyatning shaxsiy masalalar bo‘yicha qabullari va 39 tasi sayyor qabullardagi murojaatlar tashkil etadi. Bundan tashqari, elektron pochta orqali 55 ta, kombinat “Ishonch telefoni”dan 10 ta murojaat kelib tushgan. Hozirgi kunga qadar ularning 995 tasi yoki aksariyati qanoatlantirilgani bo‘lib, qolgan qismining ham ijrosi qo‘shimcha nazoratga olingan.

Bir so‘z bilan aytganda, barcha ezgu niyatlar yaxshilikdan boshlanadi. Albatta, inson manfaatlariga xizmat qilish – barchamiz uchun sharafdir. Shunday ekan, odamlarga yaxshilik qilish, ularga har jabhada yelkadosh, muammolarini hal etishda aholiga yaqin ko‘makdosh bo‘lish biz uchun muqaddas burch, masʼuliyat va iftixor namunasidir.

Shavqiddin IDIYEV,

NKMK Jismoniy va yuridik shaxslarning murojaatlari bilan

ishlashni nazorat qilish va muvofiqlashtirish bo‘limi boshlig‘i –

“Virtual qabulxona” rahbari.