• Yaratildi: 28.06.2021
• Yangilandi: 28.06.2021
• O'qildi: 2822

Kombinatning raqamlashtirishdagi ishlari eʼtirof etildi

Joriy yilning 25 iyun kuni Toshkent shahridagi Muhammad al-Xorazmiy nomidagi axborot-kommunikatsiya texnologiyalari yo‘nalishiga oid fanlarni chuqurlashtirib o‘qitishga ixtisoslashtirilgan maktabida raqamlashtirishda qo‘lga kiritgan ijobiy natijalari uchun davlat hokimiyati va boshqaruv organlarini taqdirlash marosimi o‘tkazildi.

O‘zbekiston Respublikasi Axborot texnologiyalari va kommunikatsiyalarini rivojlantirish vazirligi hamda “Elektron hukumat loyihalarini boshqarish markazi” davlat muassasasi tomonidan tashkil etilgan tadbirda Axborot texnologiyalari va kommunikatsiyalarini rivojlantirish vaziri Sh.Sodiqov, Birlashgan Millatlar Tashkiloti  Taraqqiyot Dasturining O‘zbekistondagi doimiy vakili M.Dimovska, vazirliklar, idoralar, xo‘jalik birlashmalari, tashkilotlar, mahalliy davlat hokimiyati organlari vakillari ishtirok etishdi.

Tadbirda taʼkidlanganidek, so‘nggi yillarda mamlakatimizda raqamli islohotlar bo‘yicha keng ko‘lamli ishlar amalga oshirilmoqda. Jumladan, O‘zbekiston Respublikasi Prezidentining 2020 yil 5 oktyabrdagi farmoni bilan tasdiqlangan “Raqamli O‘zbekiston – 2030” strategiyasi doirasida hududlarni va tarmoqlarni raqamli transformatsiya qilish dasturlari belgilandi.

Raqamlashtirish bo‘yicha reytingda yuqori natijalarga erishgan, elektron hukumat yo‘nalishida loyihalarni samarali amalga oshirgan vazirlik va idoralar, mahalliy davlat hokimiyati organlari 17 ta nominatsiya bo‘yicha taqdirlandi.

Quvonarlisi, taqdirlanganlar orasida Navoiy kon-metallurgiya kombinati ham bor. Kombinat “Axborot-kommunikatsiya texnologiyalarini rivojlantirish va faoliyatni raqamlashtirish borasida eng yuqori natijaga erishgan xo‘jalik boshqaruvi organi” nominatsiyasida eʼtirof etildi. Kombinatning nominatsiya g‘olibligi statuetkasi va sovg‘asini korxonaning Toshkent shahridagi vakolatxonasi rahbari Sh.Sattorov qabul qilib oldi.  

         NKMK Matbuot markazi.