• Yaratildi: 28.06.2021
• Yangilandi: 06.07.2021
• O'qildi: 3346

Sarmishsoy darasi yoshlar forumiga mezbonlik qilayapti

Navoiy kon-metallurgiya kombinati hamda “Issiqlik elektr stansiyalari” AJ tashabbusi bilan Yoshlar oyligi doirasida  “Birgalikda biz bir kuchmiz!” xalqaro yoshlar forumi Navoiy viloyatining “Sarmishsoy” darasi bag‘ridagi “Sarmish” oromgohida tashkil etildi.

Elektr energetikasi va tog‘-kon sanoati korxonalarida faoliyat yuritayotgan yoshlarning g‘oya va tashabbuslarini qo‘llab-quvvatlash, O‘zbekiston, Qozog‘iston, Rossiya Federatsiyasi va Yaponiya yoshlari uchun muloqot maydonini yaratish maqsadida tashkil etilgan bu forum Yoshlar oyligi doirasidagi eng yaxshi loyihalardan biri bo‘ldi desak mubolag‘a emas. Ushbu xalqaro nufuzli forumda 300 nafar Navoiy kon-metalurgiya kombinati, “Issiqlik elektr stansiyalari” aksiyadorlik jamiyati yoshlari qatori  Qozog‘iston, Rossiya Federatsiyasi va Yaponiya elektr energetika tarmog‘i korxonalari yoshlari ham ishtirok etmoqda.

27 iyun kuni festivalda ishtirok etish uchun Navoiy viloyatiga tashrif buyurgan yoshlar va jamoatchilik vakillari Navoiy temir yo‘l vokzalida karnay-surnay sadolari bilan kutib olindi.

Shundan so‘ng, yoshlar “NKMK tarixi” muzeyiga tashrif buyurib, korxona faoliyati, bosib o‘tgan shonli yo‘li, yutuqlari, bugungi kuni haqida keng maʼlumotga ega bo‘lishdi.

Yoshlar forumi birinchi kunining ikkinchi yarimida tadbir qatnashchilari oromgohda yaratilgan shart-sharoitlar bilan tanishdilar. Forumning ochilish marosimida so‘zg‘a chiqqan kon-metalurgiya va elektr energetika tarmog‘i korxonalarining vakillari ishtirokchilarni qutlab, samimiy tilaklarini bildirishdi. “Farhod” madaniyat saroyining ijodiy jamoalari va xonandalari tomonidan taqdim etilgan konsert dasturi barchaga ko‘tarinki kayfiyat ulashdi.

“Sarmish” oromgohida “Birgalikda biz bir kuchmiz!” xalqaro yoshlar forumi 28-30 iyun kunlari ham davom etadi.

NKMK Matbuot markazi.