• Yaratildi: 21.06.2021
• Yangilandi: 21.06.2021
• O'qildi: 2542

Zukko va bilimdon yoshlar bellashdi

Kombinat yoshlarining intellektual salohiyatini yuksaltirish, ular isteʼdodi va faolligini oshirish hamda munosib rag‘batlantirib borishda turli yo‘nalishdagi tanlovlarning ahamiyati beqiyos. Bu borada NKMK yoshlar yetakchilari tashabbusi, kombinat maʼmuriyati hamda kasaba uyushmasi Kengashi ko‘magida yoshlar o‘rtasida tanlovlar tashkil etib kelinmoqda.

Joriy yilning 19 iyun kuni “Farhod” madaniyat saroyida “Zakovat” hamda “Chto? Gde? Kogda?” intellektual o‘yinlarning “NKMK kubogi” final bosqichi bo‘lib o‘tdi. O‘zbek va rus tillarida o‘tkazilgan mazkur intellektual o‘yinlarning final bosqichida kombinat bo‘linmalaridan 13 ta yoshlar jamoasi ishtirok etdi. Finalgacha kombinat bo‘linmalari negizida o‘tkazilgan saralash bosqichlarida 100 dan ortiq yoshlar jamoalari qatnashishgandi. Intellektual o‘yinlarning qoidalariga muvofiq, besh nafar ishtirokchidan iborat har bir jamoaga 10 ta savol berilib, har bir savolga javob berish uchun bir daqiqadan vaqt ajratildi.

Yakuniy natijalarga ko‘ra, “Zakovat” intellektual o‘yinida 5-kon boshqarmasi va Navoiy mashinasozlik zavodi jamoalari faxrli uchinchi va ikkinchi o‘rinlarni egallashdi. G‘oliblikni “Do‘stlik” agrofirmasi yoshlar jamoasi qo‘lga kiritdi.

Rus tilida o‘tkazilgan “Chto? Gde? Kogda?” intellektual o‘yinida Markaziy kon boshqarmasi jamoasi birinchi, Navoiy mashinasozlik zavodi jamoasi ikkinchi, 5-kon boshqarmasi jamoasi uchinchi o‘ringa munosib topildi.

G‘olib va sovrindorlarga diplom va qimmatbaho sovg‘alar topshirildi.

NKMK Matbuot markazi.