• Yaratildi: 16.06.2021
• Yangilandi: 17.06.2021
• O'qildi: 2920

Yoshlarni birlashtirgan festival

Iyun oyi yoshlarimiz uchun haqiqiy bayramga aylandi. Jumladan, “Yangi O‘zbekiston yoshlari, birlashaylik!” shiori ostida hududlarda yoshlar oyligi bo‘lib o‘tmoqda. Tadbirlar dasturidan o‘rin olgan festivallar, turli tanlovlar, intellektual o‘yinlar, sport musobaqalari, uchrashuvlar va aksiyalar yoshlarimizni yanada faollikka daʼvat etmoqda.

Shunisi quvonarliki, iyun oyida Qoraqalpog‘iston Respublikasida “Bo‘zatov Respublika yoshlar ovozi” festivali, Sirdaryo viloyatida “Bag‘rikeng O‘zbekiston – umumiy uyimiz” millatlararo do‘stlik festivali, Farg‘ona viloyatida “Talabalar bahori – 2021” festivali, Surxondaryo viloyatida “Munozara” intellektual respublika turniri, Xorazm viloyatida “Yoshlar – O‘zbekistonning bebaho xazinasi” festivali bo‘lib o‘tgani va o‘tayotgani yuzlab iqtidorlilar, bilimdonlar, chempionlarni kashf etib, millatlararo totuvlikni mustahkamlamoqda. Eng muhimi, bu saaʼy-harakatlar zamirida yangi O‘zbekiston yoshlari o‘rtasida ahillik, jipslik, ular qalbiga mustaqillik shukuhini olib kirishdek ulug‘ maqsadlar mujassam.

Matbuot, internet tarmoqlari orqali mazkur yoshlar oyligi shu davrga qadar ko‘plab huddudlarda ko‘tarinki ruhda bo‘lib o‘tayotganiga guvohmiz. Bugun uning shukuhi Navoiy viloyati yoshlari hayotiga kirib keldi. Jumladan, shu yilning 16-18 iyun kunlari “Yangi O‘zbekiston yoshlari, birlashaylik!” shiori ostida yoshlar festivali bo‘lib o‘tadi. Viloyatning ko‘plab yoshlarini o‘z atrofida birlashtirgan festival doirasida 50 ga yaqin loyihalar o‘tkazilishi nazarda tutilgan. Erta tongdan bayram shukuhiga bezangan Navoiy shahrida asosiy bayram tadbirlariga start berildi. Ushbu tadbirlarda Navoiy kon-metallurgiya kombinatidan ham 200 nafar faol, tashabbuskor yoshlar vakillari ham ishtirok etishmoqda.

Xususan, kuning birinchi yarimida Navoiy shahridagi “Yoshlar markazi” majmuasida matbuot va ommaviy axborot vositalari uchun matbuot anjumani, buyuk mutafakkir A.Navoiy haykali maydonida mushoira kechasi, “Zamonamiz qahramonlari” loyihasi doirasida malakali shifokorlar va tajribali o‘qituvchilar bilan uchrashuv, mahsulotlar ko‘rgazmasi, milliy madaniy markazlar chiqishlari, yosh sportchi oilalar o‘rtasida estafeta, “Yosh kitobxon oila” tanlovi, “Yosh oshpazlar” bellashuvi, biznes sayohat kabi tadbirlarga boy bo‘ldi. Bunday rang-barang dasturlar yoshlarimiz qalbida ulkan taassurot qoldirdi.

Yana shuni mamnuniyat bilan taʼkidlash joizki, kuning ikkinchi yarimida va kechki paytda bo‘lib o‘tadigan tadbirlar undanda qiziqarliroqdir. Albatta, buni eshitgandan ko‘ra, ko‘z bilan ko‘rgan yaxshi. Shunday ekan, hamkasblarimizni oila aʼzolari bilan Navoiy shahrida bo‘lib o‘tayotgan qiziqarli, hayajonli festival tadbirlarini miriqib tomosha qilishga chorlab qolamiz.

Ha darvoqe, kechki dasturlarda elimiz suygan o‘nga yaqin taniqli sanʼatkorlar, boshlovchilar, badiiy jamoalar chiqishlari, shuningdek, yaqin kunda barchamiz orziqib kutayotgan Navoiy osmonida dronlar shousi bo‘lib o‘tishi ko‘zda tutilgan.

Shahrimizda yoshlar festivali davom etmoqda...

NKMK Matbuot markazi.