• Yaratildi: 31.03.2021
• Yangilandi: 31.03.2021
• O'qildi: 2470

Oman Sultonligi milliy olimpiya qo‘mitasi hamda Osiyo suzish federatsiyasi vakillari Navoiyda bo‘lishdi

Suv sportining suzish, suv polosi, sinxron suzish va suvga sakrash turlari bo‘yicha mamlakatimiz vakillari ko‘plab xalqaro turnirlarda, Osiyo o‘yinlari hamda qit’a chempionatlarida Vatanimiz sharafini munosib himoya qilibkelishmoqda. O‘z navbatida, O‘zbekiston qator nufuzli musobaqalarga mezbonlik qilib, yangidan-yangi chempionlar kashf etilgan zamin sifatida tarixga kirdi.

Osiyo Olimpiya kengashining Bosh Assambleyasida Toshkent shahri 2025 yil o‘tkaziladigan yoshlar Osiyo o‘yinlarini qabul qilish huquqini qo‘lga kiritdi. "Toshkent-2025" yoshlar Osiyo o‘yinlari uchun Toshkentda 160 gektar maydonga Olimpiya shaharchasi va zamonaviy suv sporti markazi qurilayapti. Qolaversa, suv sportiga homiy sifatida belgilangan Navoiy kon-metallurgiya kombinati hamda "O‘zmetkombinat" aksiyadorlik jamiyatlari tomonidan soha rivojiga yetarlicha sarmoya ajratilmoqda.

Joriy yil 30 mart kuni Navoiy shahrida NKMK bosh direktori, O‘zbekiston suzish federatsiyasi raisi Quvondiq Sanaqulov bilan Oman Sultonligi milliy olimpiya qo‘mitasi hamda Osiyo suzish federatsiyasi Bosh kotibi Taxa Al Kishri rahbarligidagi Osiyo suzish federatsiyasi ishchi guruhining uchrashuvi bo‘lib o‘tdi.

Uchrashuvda yaqin istiqbolda respublikamizda suv sportini yanada rivojlantirish, keng ommalashtirish, moddiy-texnika bazasini mustahkamlash yo‘lida izchil sa’y-harakatlar olib borishga kelishib olindi.

Tashrif davomida mehmonlar "NKMK tarixi" muzeyi bilan tanishdilar.

NKMK Matbuot markazi.