• Yaratildi: 04.03.2021
• Yangilandi: 04.05.2021
• O'qildi: 3091

Kombinat milliy tanlov g‘oliblari safida

Oldin xabar berganimizdek, O‘zbekiston Respublikasi Oliy Majlisi Senati huzuridagi Gender tenglikni taʼminlash masalalari bo‘yicha komissiyasi tomonidan Mahalla va oilani qo‘llab-quvvatlash vazirligi bilan hamkorlikda “Gender tenglik faoli” milliy tanlovining saralash bosqichlari o‘tkazildi.

Mazkur tanlovda gender tenglikni taʼminlash sohasida 2020 yil yakunlari bo‘yicha yuqori natijalarga erishgan, ushbu yo‘nalishda jamiyat rivoji uchun tashabbus ko‘rsatayotgan, o‘z sohasiga tegishli yo‘nalishlarda dolzarb vazifalarni amalga oshirayotgan vazirlik, idora, nodavlat notijorat tashkilotlari ishtirok etdi. Yaqinda tanlov ekspertlari kombinatga tashrif buyurib, bu sohada korxonada olib borilayotgan ishlar bilan yaqindan tanishgan edi.

3 mart kuni Toshkent shahrida 8 mart – Xalqaro xotin-qizlar kuni munosabati bilan O‘zbekiston ijtimoiy va siyosiy hayotining barcha sohalarida ayol rahbarning ijobiy obrazini mustahkamlashga qaratilgan “Ayollar yetakchi lavozimlarda: COVID-19 pandemiyasi sharoitida kelajakda tenglikka erishish” mavzusida davra suhbati o‘tkazildi. Ushbu tadbir doirasida “Gender tenglik faoli” milliy tanlovi g‘oliblarini taqdirlash marosimi bo‘lib o‘tdi.

Taʼkidlash joizki, Navoiy kon-metallurgiya kombinati tanlovning “Gender tenglikni taʼminlashda eng faol vazirlik/davlat muassasasi, tashkilot va idoralar” nominatsiyasida g‘oliblikni qo‘lga kiritdi. Tadbirda NKMK Oila va xotin-qizlarni qo‘llab-quvvatlash kengashi raisi Sabohat Nazarova ishtirok etdi.

Tanlov g‘oliblari maxsus diplom va esdalik sovg‘alari bilan taqdirlandilar.

NKMK Matbuot markazi.