• Yaratildi: 24.02.2021
• Yangilandi: 24.02.2021
• O'qildi: 3511

Transport vositalari haydovchilari uchun yangi imkoniyatlar

Kombinat bo‘linmalarida konlardan qazib olinayotgan, tarkibida oltin bo‘lgan maʼdan va tog‘ jinslarini tashishda og‘ir yuk ko‘taruvchi transport vositalaridan keng foydalaniladi.

Bugungi kunda Markaziy kon boshqarmasining Avtomobil transporti boshqarmasida jahonning BelAZ (Belorus), Caterpillar (AQSH), Komatsu (Yaponiya) kabi yetakchi kompaniyalari tomonidan ishlab chiqarilgan 370 dan ortiq zamonaviy konchilik texnikalari mavjud bo‘lib, ular “Muruntov”, “Auminzo-Amantoy” konlaridan maʼdan va tog‘ jinslarini qazib chiqarish va tashishga jalb qilingan. Korxona avtoparki zamonaviy transport vositalari bilan yildan-yilga kengayib borayapti. 2020 yilda boshqarmaga 25 ta Komatsu konchilik texnikalari, shu jumladan, 55 tonna yuk ko‘tarish quvvatiga ega 14 ta avtoag‘dargich keltirildi. Joriy yilning o‘tgan davrida 220 tonna yuk ko‘tarish quvvatiga ega 4 ta Komatsu avtoag‘dargichi olib kelindi. Yil oxirigacha 20 dan ortiq shunday konchilik texnikalarini olib kelish rejalashtirilgan. Komatsu texnikalarini ishlatish va ularga texnik xizmat ko‘rsatish maqsadida xorijiy kompaniyaning O‘zbekistondagi rasmiy vakili – “IKO Machinery” MCHJ XK tomonidan yaqinda Avtomobil transporti boshqarmasida o‘quv markazi tashkil etildi. O‘quv xonasi 16 ta kompyuter bilan jihozlangan bo‘lib, u yerda mutaxassislar nafaqat Komatsu texnikasini boshqarish, balki uning imkoniyatlari bilan ham tanishib borishadi.

Kelajakda Markaziy kon boshqarmasi Avtomobil transporti boshqarmasiga Komatsu avtoag‘dargichini haydash simulyatorini olib kelish rejalashtirilgan.

NKMK Matbuot markazi.