• Yaratildi: 21.01.2021
• Yangilandi: 21.01.2021
• O'qildi: 2809

Navoiyda navoiyxonlik tadbirlari

Navoiy kon-metallurgiya kombinati tashabbusi bilan 20 yanvar kuni buyuk mutafakkir, shoir va davlat arbobi Alisher Navoiy tavalludining 580 yilligiga bag‘ishlangan maʼnaviy-maʼrifiy tadbirlar boshlab yuborildi.

Ushbu navoiyxonlik kechalarida mamlakatimizning yetuk va taniqli navoiyshunos olimlari – Alisher Navoiy nomidagi Toshkent davlat o‘zbek tili va adabiyoti universiteti kafedra mudiri, filologiya fanlari doktori, professor Nurboy Jabborov, Toshkent davlat sharqshunoslik universiteti dotsenti, filologiya fanlari bo‘yicha falsafa doktori Olim Davlatov, O‘zbekiston Milliy universiteti kafedrasi dotsenti, filologiya fanlari bo‘yicha falsafa doktori Shahlo Hojiyeva, Navoiy davlat pedagogika instituti dotsenti, filologiya fanlari nomzodi Tohir Xo‘jayev, shuningdek, NKMK bosh direktori maslahatchisi, tarix fanlari nomzodi X.Raupovlar o‘z maʼruzalari bilan ishtirok etishmoqda.

Ushbu maʼnaviy tadbir Navoiy shahridagi buyuk mutafakkir haykali poyiga gulchambar qo‘yish bilan boshlanib, unda NKMK rahbariyati, kombinat yoshlari, poytaxtimizdan tashrif buyurgan taniqli navoiyshunos olimlar, o‘qituvchi va talabalar, yozuvchi-shoirlar va ommaviy axborot vositalari vakillari qatnashdi.

Shundan so‘ng, tadbir ishtirokchilari uchun “NKMK tarixi” muzeyiga mediatur, maʼnaviy-maʼrifiy seminar va matbuot anjumani tashkil etildi va so‘z mulkining sultoni hayoti va ijodiga bag‘ishlangan mazkur tadbirlar har jihatdan savol-javoblarga boy bo‘ldi.

Buyuk mutafakkir Alisher Navoiy tavalludining 580 yilligiga bag‘ishlangan maʼnaviy-maʼrifiy tadbirlar kombinatning yirik bo‘linmalarida ham davom etmoqda...

NKMK Matbuot markazi.