• Yaratildi: 29.12.2020
• Yangilandi: 29.12.2020
• O'qildi: 3093

2020 yilda nashr etilgan kitoblar

Navoiy kon-metallurgiya kombinati tashabbusi bilan har yili ilmiy, ilmiy-ommabop va badiiy adabiyotlar chop etib kelinmoqda.

Joriy yilda NKMK bosh direktori Q.Sanaqulov boshchiligidagi bir guruh mutaxassislarning “Reniy”, Q.Sanaqulov va I.Hamroyevning “Kosmoplanetar olam va yer jarayonlari haqida” ilmiy va ilmiy-ommabop asarlari, I.Rahmatovning “Hayot chorrahalarida” avtobiografik essesi, N.Jo‘libekovning “Финансово-экономические аспекты функционирования Навоийского ГМК на разных этапах развития” nomli monografiyasining nashr etilgani buning isbotidir.

Shuningdek, joriy yilda kombinat mutaxassislari va Abu Rayhon Beruniy nomidagi Sharqshunoslik instituti hamkorligida akademik U.Karimovning “Ar-Roziyning nomaʼlum “Sirlar siri kitobi” o‘zbek tiliga tarjima qilinib, nashr etildi.

Mamlakatimiz Prezidentining 2019 yil 23 oktyabrdagi “Ikkinchi jahon urushida qozonilgan G‘alabaning 75 yilligini munosib nishonlash to‘g‘risida”gi qarori asosida kombinatda keng ko‘lamdagi tayyorgarlik ishlari olib borildi. Bu sanaga bag‘ishlab o‘tkazilgan “Jasorat va matonat madhi” tanlovi qatnashchilaridan 42 nafar ijodkorning sheʼr va publitsistik maqolalari jamlanib, ota-bobolarimiz jasoratini keng tarannum etuvchi “Uyg‘oq xotiralar” kitobi chop etildi.

Kombinatda mehnat qilayotgan konchilar, metallurglar, geologlar, qo‘yingki, turli kasb egalari o‘zlarining ko‘ngil izhorlarini satrlarga ko‘chirib, saqlab yurishardi. Kombinat rahbariyatining tashabbusi bilan ularning sheʼrlari va publitsistik maqolalaridan jamlangan “Kengliklar sururi” to‘plami chop etildi.

NKMK Matbuot markazi.