• Yaratildi: 19.10.2020
• Yangilandi: 25.12.2020
• O'qildi: 2481

Avtoag‘dargichlar haydovchilari uchun yangi imkoniyatlar

Kombinatning “Sharqiy” va “Dovg‘istov” konlarida tog‘ jinslarini tashiydigan avtoag‘dargichlar haydovchilarining mahorat va bilimini oshirish maqsadida Shimoliy kon boshqarmasi Avtomobil transporti boshqarmasi o‘quv markazida “Komatsu” avtoag‘dargichini haydash simulyatori foydalanishga topshirildi.

Bugungi kunda kon boshqarmasining mazkur bo‘linmasida 100 dan ortiq og‘ir yuk ko‘taruvchi avtoag‘dargichlar mavjud bo‘lib, ular konlardan qazib chiqarilayotgan maʼdan va tog‘ jinslarini tashishga jalb qilingan. Kombinat rahbariyatining bevosita ko‘magida transport boshqarmasining parki zamonaviy avtotransport vositalari bilan yildan-yilga kengayib borayapti. Joriy yilda boshqarmaga 90 tonna yuk ko‘tarish quvvatiga ega 6 ta “Caterpillar” va 26 ta “Komatsu” rusumli avtoag‘dargichlar keltirildi.

“Komatsu” texnikalarini ishlatish va ularga texnik xizmat ko‘rsatish maqsadida bir necha oy oldin xorijiy kompaniyaning O‘zbekistondagi rasmiy vakili – “IKO Machinery” MChJ XK tomonidan Avtomobil transporti boshqarmasida o‘quv markazi tashkil etildi. Korxona mutaxassislari yaqinda ushbu markazda “Immersive Technologies” firmasi tomonidan tayyorlangan “Komatsu” avtoag‘dargichini haydash simulyatorini o‘rnatishdi. Mazkur simulyatorda olib boriladigan o‘quv mashg‘ulotlarida haydovchilar amaliy tajribalarini oshirish bilan birga zamonaviy konchilik texnikasining imkoniyatlarini ham o‘zlashtirmoqdalar.

Simulyatorda “Komatsu” avtoag‘dargich kabinasi mavjud. Haydovchi kabinaga o‘tirib, mashg‘ulotlarni xavfsizlik kamarini taqishdan boshlaydi. Agar xavfsizlik kamari taqilmasa, simulyator ishlamaydi. Mashg‘ulotlarda haydovchilar avtoag‘dargichni kunduzi yoki kechasi, yilning turli fasllaridagi har xil ob-havo sharoitlarida boshqarish yuzasidan mahoratlarini oshirishadi.

NKMK Matbuot markazi.