• Yaratildi: 06.03.2020
• Yangilandi: 21.12.2020
• O'qildi: 1436

Senator tashabbuslari qo‘llab-quvvatlandi

Joriy yilning 6 mart kuni Xalq deputatlari Zarafshon shahar Kengashining navbatdagi III-sessiyasida O‘zbekiston Respublikasi Oliy Majlisi Senati a’zosi, Navoiy kon-metallurgiya kombinati bosh direktori Quvondiq Sanaqulov ishtirok etdi.

Sessiyada 2020 yilda Zarafshonda ishsiz yoshlar bandligini ta’minlash bo‘yicha ustuvor vazifalar yuzasidan to‘rtta sektor rahbarlarining axboroti tinglandi. Ma’lumki, bugungi kunda yoshlarning kelajagi va taqdiri uchun qayg‘urish, ularning muammolarini amaliy hal etish barcha tizimdagi rahbarlarning asosiy vazifasiga aylangan.

Senator Q.Sanaqulov tomonidan hududdagi 763 nafar ishsiz yoshlar bandligini ta’minlash maqsadida, ularni deputatlar, korxona va tashkilotlar rahbarlariga biriktirish va ishga joylashtirish bo‘yicha tashabbusi sessiya ishtirokchilari tomonidan bir ovozdan qo‘llab-quvvatlandi. Tashabbuskor senator Q.Sanaqulov 50 nafar ishsiz yoshlarni ishga joylashtirishni o‘z zimmasiga oldi. Kun tartibida bildirilgan mulohazalarda mazkur masala doimiy ravishda deputatlar ishtirokida ko‘rib borish lozimligi ta’kidlandi.

Shuningdek, senator tomonidan Xalq deputatlari Zarafshon shahar Kengashi faoliyatini namunali tashkil etish bo‘yicha bergan taklifi ham deputatlar tomonidan bir ovozdan qo‘llab-quvvatlandi.

NKMK Matbuot markazi.